Honorable Depite mu nteko ishinga amategeko Agathon Rwasa akaba n’umuyobozi w’ishyaka ritavugarumwe n’ubutegetsi bw’u Burundi CNL avuga ko imfungwa nyinshi zuzuye mu magereza zifunzwe zizira ubusa.
Ibi Depite Rwasa abivuze nyuma y’aho umuyobozi w’ishyirahamwe rishinzwe kurengera uburenganzira bw’ikiremwamuntu mu Burundi CNIDH agejeje ku nteko nshingamategeko ibyavuye mu bushakashatsi bakoze mu mwaka ushize.
Sixte Vigny Nimuraba uyoboye CNIDH avuga ko mu bushakashatsi bakoze mu magereza yose hagiye haboneka umubare munini w’abantu bafunzwe ariko ntibagaragaze impamvu ituma baba benshi.
Agathon Rwasa we akaba anenga icyo cyegeranyo avuga ko benshi bafunzwe bazira ubusa. Rwasa agatanga urugero ku bayoboke b’ishyaka CNL ayoboye buzuye mu magereza barimo bazira ubusa kandi ntacyaha bakoze.
Agathon Rwasa aragira ati:«Turebye imibare y’abafunzwe bose uko bangana biragaragara neza ko wagira ngo mu Burundi twihutira gufunga gusa kuruta guha ubutabera ababukeneye.
Muri abo bantu benshi bafunzwe usanga bafunzwe kubera akagambane, umuntu agashinjwa ibirwanisho kubera akagambane kandi ntabyo babonye agahera mu munyururu atyo, abandi ugasanga bafunzwe kandi baragizwe abere n’urukiko.
Ikindi gituma imibare y’imfungwa ikomeza kwiyongera ni impamvu za Politike aho usanga nk’abayoboke ba CNL bafungwa ntacyo bazira kubera gusa ari aba CNL. Ibi bigaragaza ko hari ikibazo hagati ya leta n’ishyaka CNL.
Leta y’uburundi Igomba gushakira ibisubizo ikibazo kigaragara mu bucamanza aho usanga hariho abantu bivanga mu butabera kubera igihagararo bafite mu nzego z’igihugu bagatera ubwoba abacamanza ntibigenge mu mwuga wabo ugasanga baciye urwa kibera maze abantu bagahera mu buroko bazira ubusa.
Rafiki Karimu
Rwandatribune.com
