Ihuriro ry’Abarundi baba mu bihugu by’ i Burayi ”FODIB” na CANADA “ABC” baranenga icyemezo cya Evariste Ndayishimiye cyo kohereza abasirikare muri Congo, kurwana na M23 kandi akaba yarabikoze binyuranije n’amategeko, bagasaba ko n’imiryango yabaguye k’urugamba yahabwa indishyi z’akababaro.
Ibi babitangaje babinyujije mu itangazo ryasohowe n’ayo mahuriro y’Abarundi ari mu bihugu by’ i Burayi na Canada mu itangazo ryabo banyujije ku rubuga rwa X, rwahoze rwitwa Twitter.
Inkuru dukesha Tele Renaissance, ivuga ko Oscar Butare uyoboye ihuriro FODIB anenga na none icyemezo cya leta y’u Burundi cyo gufunga imipaka ibuhuza n’igihugu cy’ u Rwanda, aho ngo babona ko icyo cyemezo bagitegetswe n’ubutegetsi bwa Congo kandi icyo cyemezo akaba ntakintu na kimwe kimariye u Burundi.
Oscar Butare uyoboye ihuriro FODIB aragira ati:”Twanditse iri tangazo tugira ngo tugaragaze akababaro twatewe n’icyemezo cya Evariste Ndayishimiye cyo kohereza abasirikare muri Congo kurwana na M23, ibyo akaba yarabikoze mugihe kandi ariwe uyoboye umuryango w’ibihugu bya Afurika y’uburasirazuba EAC, kandi muri EAC bari bamaze kohereza itsinda ry’abasirikare bashinzwe kugarura amahoro muri Congo.”
Ati: “Ibi ariko Ndayishimiye akaba yarabirenzeho akohereza abasirikare bo kujya gufasha Congo mu kurwanya inyeshyamba za M23 kandi binyuranyije n’amategeko, bivuze ko iki icyemezo kibogamye, kandi bigaragara ko nta nyungu u Burundi bufite mu kujya kwivanga n’intambara yo muri Congo. Icyo cyemezo kikaba kandi kibangamiye itegeko nshinga ry’ u Burundi”.
Oscar kandi yagize ati: “Tubabajwe na none n’umwanzuro Leta y’u Burundi yafashe wo gufunga imipaka u Burundi buhana imbibi n’igihugu cy’u Rwanda, aho dusanga uwo mwanzuro warafatiwe i Kinshasa kunyungu za Congo kuruta inyungu z’u Burundi”.
Iki kinyamakuru cyanditse kandi ko Abarundi batari bake bakomeje gusaba Leta y’u Burundi kugira icyo ikora igatanga umuco ku iyoherezwa ry’abasirikare b’igihugu, n’inyungu abarundi bafitemo aho kugeza uyu munsi Leta y’u Burundi ntacyo iragaragaza.
Rafiki Karimu
Rwandatribune.com
