Kuri uyu wa gatanu tariki ya 12 Gashyantare 2021, Mu gihugu cy’u Burundi Imbonerakure zisanzwe zambutsa abantu mu mugezi wa Ruzizi , zishe umurundi uzwi ku izina rya Elisha Nyuma yo kumwambura ibyo yari afite bahita bamujugunya muri uyu mugezi.
Iyi nkuru y’urupfu rwa Elisha yamenyekanye kuri uyu wa gatandatu , Nyakwigendera yari atuye Gasenyi , komini ya Buganda, intara ya Kibitoki ; yishwe agiye muri Repubulika iharanira demokarasi ya Kongo mu bucuruzi yamburwa ibyo yari afite byose bahita bamujugunya muri uyu mugezi .
Abaturage bavuga ko bamenye iyicwa rya Elisha Nyuma y’uko Imbonerakure zamwishe zananiwe kumvikana mu kugabana ibyo bari bambuye Nyakwigendera bakabishwaniramo bigatuma bijya hanze ko aribo bamwivuganye bakamuta mu Mugezi.
Muri izi mbonerakure zishe uyu muturage hamenyekanye imwe muri zo izwi ku izina rya Dieudonne wahise uhunga ubu hakaba hataramenyekana aho yaba yahungiye ngo aryozwe icyaha cy’ubwicanyi.
Polisi y’igihugu cy’u Burundi yahise ita muri yombi umugore we n’abo mu muryango wa Nyakwigendera kugirango hakorwe iperereza ku rupfu rwa Elisha .
Si ubwa mbere muri iki gihugu humvikanye kwamburwa ku ngufu n’imfu zikorwa n’Imbonerakure mu bice bitandukanye ariko abaturage bakinubira ko badafatwa ngo baryozwe ubwicanyi baba bakorewe aba baturage.
Nkundiye Eric Bertrand
