Nyuma y’uko Urwego rw’Ubutasi mu Burundi, rutaye muri yombi uwahoze ari Umunyamakuru wa RPA, rwahakaniye umuryango we ko babonana.
Itabwa muri yombi ry’uyu munyamakuru witwa Olivier Bugegene, ryamenyekanye mu cyumweru gishize ko uyu wahoze akorera RPA (Radio Publique Africaine), afungiye muri Gereza y’urwego rw’Ubutasi iri mu murwa mukuru wa Bujumbura.
Ikinyamakuru SOS Medias Burundi, kiratangaza ko ubu amakuru agezweho ari uko uru rwego rushinzwe ubutasi mu Burundi, rwangiye umuryango w’uyu munyamakuru ko babonana.
Iki kinyamakuru kivuga ko iki kibazo cyamenyeshejwe Komisiyo y’Igihugu ishinzwe uburenganzira bwa Muntu.
Gikomeza kivuga ko “kugeza ubu umuryango nturamenyeshwa impamvu nyazo zatumye atabwa muri yombi.”
Ifatwa rya Olivier Bugegene ryavuzwe mu gihe hariho hanavugwa ifungwa rya General Allain Guillaume Bunyoni wabaye Minisitiri w’Intebe mu Burundi, ryagarutsweho cyane mu karere.
Uyu mujenerali wari usanganywe icyubahiro gikomeye mu Burundi, yatawe muri yombi tariki 21 Mata 2023, aho akurikiranyweho ibyaha bitatu birimo icyo guhungabanya umutekano w’Igihugu.
RWANDATRIBUNE.COM
