Imitwe y’inyeshyamba imaze iminsi igaba ibitero mu mijyi imwe ya Centrafrique yatangaje ko itanze agahenge, ariko isaba ko amatora yo ku cyumweru asubikwa, nk’uko ibinyamakuru muri iki gihugu bibivuga.
Coalition des Patriotes pour le Changement (CPC), ihuriro ry’inyeshyamba leta ivuga ko uriri inyuma ari uwahoze ari perezida Francois Bozize, niryo ryatangaje agahenge k’amasaha 72 nk’uko bivugwa na Corbeau News.
Bwana Bozize yakomeje guhakana ko atari we uri inyuma y’iyi mitwe y’inyeshyamba.
Iki kinyamakuru kivuga ko mu ijoro ryo kuwa gatatu habaye imirwano yashyamiranyije izi nyeshyamba n’ingabo za leta mu majyepfo y’igihugu, ndetse ko zafashe imijyi ya Beloko na Cantonier iri mu majyaruguru.
Ejo kuwa gatatu, Perezida Faustin-Archange Touadéra na Emmanuel Macron w’Ubufaransa, baganiriye ku bibazo biri muri iki gihugu, Ubufaransa buvuga ko “bwamagana abashaka guhungabanya Centrafrique.”
Nyuma yo kuganira kwabo indege z’intambara z’Ubufaransa zahise zitangira kugenda hejuru y’ikirere cya Centrafrique, ibi biri mu bwumvikane bagiranye nk’uko itangazo ry’ibiro bya perezida w’Ubufaransa ribivuga.
Mu cyumweru gishize, ibihugu by’Uburusiya n’u Rwanda byohereje abasirikare amagana muri Centrafrique, bagiye kurengera ubutegetsi bwa Touadera.’
Centrafrique ntabwo yagize amahoro arambye kuva mu myaka ya 1960 yabona ubwigenge.
Mu 2013 yaguye mu kaga ubwo inyeshyamba z’Abayisilamu zitwa Seleka zafataga ubutegetsi zihiritse Bozize mu gihugu gituwe ahanini n’Abakiristu.
Itsinda ry’inyeshyamba ziyise anti-balaka zahagurukiye kurwanya Seleka.
Ku gitutu cy’amahanga, mu 2014 Seleka yahaye ubutegetsi guverinoma y’inzibacyuho, gusa ubwicanyi bwarakomeje mu gihugu nubwo hari ingabo za ONU n’iz’Ubufaransa.
Amatariki y’ingenzi mu mateka ya Centrafrique:
1880 – Ubufaransa bwafashe aka gace, buhagira akarere kabwo k’ubucuruzi.
1960 – Iki gihugu cyabonye ubwigenge, David Dacko aba perezida, ashyiraho ubutegetsi bw’ishyaka rimwe.
1965 – Dacko yahiritswe ku butegetsi n’umukuru w’ingabo, Jean-Bedel Bokassa, wahise yiyita umwami w’abami “w’Ubwami bwa Africa yo hagati”.
1979 – Bokassa yahiritswe ku butegetsi n’abashyigikiwe n’ingabo z’Ubufaransa.
1981 – Umukuru w’ingabo Andre Kolingba yafashe ubutegetsi.
1993 – Ange-Felix Patasse yatsinze amatora, arangiza ubutegetsi bw’abasirikare bw’imyaka 12.
2003 – Uwari ukuriye ingabo Francois Bozize yashinze inyeshyamba maze afata ubutegetsi ku ngufu.
2009 – Ingabo za leta ye zahanganye n’inyeshyamba. UN yemeza kohereza ingabo zayo zo kugarura amahoro.
2012 Ugushyingo – Umutwe w’inyeshyamba wa Seleka vuba vuba wafashe amajyaruguru n’ibice byo hagati mu gihugu, amaherezo n’umurwa mukuru, Bozize arahunga.
2013 – Ubwicanyi bukomeye mu gihe abarwanyi bishingikirije ku madini ya Isilamu n’Abakiristu bashyamiranye.
2014 – Michel Djotodia – wari uyoboye Seleka yahiritse Bozize – yavuye ku butegetsi. Catherine Samba-Panza ashyirwa ku butegetsi bw’inzibacyuho.
2015 – Referendumu ku mpinduka mu itegekoshinga, yakurikiwe n’amatora ya mbere y’umukuru w’igihugu.
2016 – Amatora y’umukuru w’igihugu, intsinzi yegukanywe na Touadera, wahoze ari minisitiri w’intebe kubwa Bozize.
