Col Maguma wari umwe mu bayobozi ba Mai Mai Kadima yaguye mu mirwano yabereye mu gace ka Vitshumbi ,ko muri sheferi ya Bwito muri Teritwari ya Rusthuru nyuma y’uko inyeshyamba yari ayoboye zaguye mu gico zatezwe n’ingabo za Congo FARDC.
Amakuru Rwandatribune yamenye ni uko aka gace ka Vitshumbi Col Maguma yarasiwemo kari mu birometero 57 uvuye mu majyarugu ya Kiwanja muri Kivu y’Amajyaruguru hasanzwe hari ibirindiro by’umutwe wa Mai Mai.
Bivugwa ko imirwano Col Maguma yarasiwe n’ingabo za FARDC yatangiriye ahitwa Tigo ahagana saa tatu z’ijoro(21H00) ikagera mu rukerera rwo kuwa Gatanu tariki ya 22 Mutarama 2022.
Uyu Maguma wari kumwe n’abarinzi be 5 , ngo nyuma yo kubona barashwe urufaya rw’amasasu umuyobozi wabo akicwa bahise biruka berekeza muri Pariki ya Virunga .
Col Maguma yari asanzwe ayobora abarwanyi ba Mai Mai mu duce twa Chondo na Chanika turi ku nkombe z’ikiyaga cya Edouard aho bivugwa ko ariwe washyiragaho amategeko agenga abarobyi bose mu duce twa Vitshumbi na Nyakakoma,uyu mutwe wa Mai mai Kadima ukaba wakoranaga n’inyeshyamba za FPP/ABAJYARUGAMBA zirwanya ubutegetsi bw’uRwanda.
Col Maguma yavuye mu birindiro bye ahunze ibitero bya FARDC aho bivugwa ko yari asaigaye afite ibirindiro muri Pariki ya Virunga. Aha muri Pariki ya Virunga kandi Col Maguma ngo yari yarahuje imbaraga n’imitwe ya Mai Mai Kadima na Mai Mai Kabido isanzwe ikorera muri Teritwari ya Lubero.
Bivugwa ko kugeza mu masaha y’umugoroba wo kuwa Gatanu tariki tariki ya 21 Mutarama 2022 umurambo wa Col Maguma wari ukiri aho yarasiwe, gusa imboni ya Rwandatribune muri aka gace ikaba yemeje ko mu gitondo cyo kuri uyu wa Gatandatu washyinguwe n’abaturage batuye hafi yaho yarasiwe n’ingabo za Congo.
Agace ka Vitshumbi gaherereye muri teritwari ya Rutschuru karangwamo imitwe y’abarwanyi biganjemo abo mu bwoko bw’abanande,Abahunde n’abatembo,hakiyongeraho imitwe yitwa ko irwanya ubutegetsi bw’uRwanda ariyo RUD URUNANA na FPP ABAJYARUGAMBA,iyi mitwe yakomejwe gushinjwa n’abaturage bako gace kubaka imisoro ihanitse y’ubutaka ndetse n’ibikorwa by’iyicarubozo.
Mwizerwa Ally
