Muri Tanzania, Hon Freeman Mbowe, mudepite mu Nteko Ishinga Amategeko uba mu ishyaka CHADEMA ritavuga rumwe n’ubutegetsi bwa John Pombe Magufuli, yatangaje ko ubwandu bw’icyorezo cya Covid-19 ari bwinshi muri iki gihugu.
Ni ubutumwa yatangiye ku rubuga rwa Twitter kuri uyu wa 24 Mutarama 2021, Hon. Freeman Mbowe avuguruza amakuru yatangajwe na Perezida Magufuli wemeza ko iki cyorezo kitakiri muri Tanzania.
Hon. Freeman Mbowe mu butumwa bwe, yagereranyije uyu Mukuru w’Igihugu na Leta n’abanyabyaha, ati: “Ibyo JPM (John Pombe Magufuli) na Leta ye bavuga kuri Covid-19 ni icyaha cyibasira inyokomuntu, kiganisha ku guhungabana k’ubuzima n’ubukungu.”
Akomeza ati: “Abaturage bayobywa bari gupfa. Tanzania irimo Covid-19! Guceceka ni ubucucu. Abaganga na WHO nimwibuke indahiro zanyu, muhagurukire kurwanya iki gitugu.”
Guverinoma ya Tanzania iheruka gutangaza amakuru y’ubwandu bwa Covid-19 muri Mata 2020, ubwo yari ifite abarwayi babarirwa muri 500. Guhera mu ntangiriro za Kamena 2020, Perezida Magufuli yatangaje ko iki cyorezo cyacitse muri Tanzania, asaba abaturage gukomeza ibikorwa byabo nta mpungenge, ndetse hategurwa amasengesho yo gushima Imana.
