Urwego rw’abanyamakuru bigenzura mu Rwanda (RMC) rwavuze ko umunyamakuru Dieudonne Niyonsenga uzwi nka Cyuma Hassan ,atari umunyamakuru w’umwuga nk’uko akunze kumvikana avuga ko atangaza inkuru za Kinyamwuga .
Nk’uko bigaragara mu ibaruwa yanditswe kuri uyu wa 14 Ukwakira 2021 n’Umunyamabanga w’uru Rwego Mugisha Emmanuel, umunyamakuru Cyuma Hassan ngo si umunyamwuga nk’uko kenshi akunze kubyiyitirira mu nkuru ze zica ku muyoboro wa Youtube yise Ishema TV.
Ibi RMC ibivuga ishingiye ku itegeko nomero 02/2013 mu ryo kuwa 28/02/2013 cyane cyane mu ngingo yayo ya gatatu ivuga ko”Umunyamakuru w’Umunyarwanda yaba ukora mu kigo cy’itangazamakuru cyangwa Uhagarariye igitangazamakuru cy’amahanga wese ahabwa uburenganzira n’urwego rw’abanyamakuru bigenzura mu Rwanda(RMC).
RMC ivuga ko umuntu wese yemerewe gutangaza ibitekerezo bye ku mbuga nkoranyambaga gusa ikavuga ko adakwiye kwitwa umunyamakuru.
RMC isoza ibaruwa yayo isaba abaturage cyangwa undi wese usabwa amakuru n’umunyamakuru ko agomba kubanza kumusaba kumwereka ikarita y’umwuga itwangwa na RMC.
Cyuma Hassan ni kenshi akunze gutumizwa n’Urwego rw’Igihugu rw’Ubugenzacyaha RIB akenshi biturutse ku nkuru zica igikuba hagamijwe guteza imvururu muri rubanda.
Ibi bibaye kandi mu gihe, abantu 6 barimo umuyobozi wa Umubavu TV Nsengimana Theoneste yatawe muri yombi na RIB imukurikiranye icyaha cyo gutangaza amakuru y’ibihuha.
