Kuri uyu wa gatanu tariki ya 28 Kamena 2024 ishyaka Green Party rirangajwe imbere n’ umuyobozi waryo Dr Frank Habineza ryiyamamarije mu karere ka Gisagara umurenge wa Musha kuri site y’akagari ka Bukinanyana.
Dr Frank Habineza yijeje abaturage b’akarere ka Gisagara iterambere rirambye binyuze mu bigega 8 azashyiraho nibamugirira ikizere bakamutora akaba Perezida.
Muri ibyo bigega bizaba birimo ibyo kwihaza mu biribwa, iby’ubucuruzi n’ibindi.
Dr Frank Habineza by’umwihariko akomeza ashimangira ko natorwa azaha abaturage b’akarere ka Gisagara bo mu murenge wa Musha umuhanda mwiza( kaburimbo).
Yakomeje anavuga ko yitegereje asanga ako karere gafite ibibazo by’amazi yemerera abaturage b’akarere ka Gisagara amazi meza akagera kuri bose.
Dr Frank yakomeje agira ati: ” Ibyo mukennye byose mubona ko bidashoboka igihe kirageze ngo mubibone igihe ni iki”.
Abaturage nabo bahamya ko bakeneye umuhanda ubahuza n’utundi turere mu rwego rwo koroshya imihahiranire ndetse n’imigenderanire gusa bakagira ibyo bashima byumwihariko.
Ingabire Denise waganiriye na Rwandatribune yadutangarije akamuri ku mutima. Ati” Dr Frank yarakoze cyane mbere wishyuraga mutiweli ukamara ukwezi utivuza kuburyo iyo warwaraga ukwezi kutarashira wabaga uhuye n’ingorane none ubu turivuza ako kanya.
Ibikorwa byo kwiyamamaza bikaba byakomereje mu karere ka Ruhango.
Icyitegetse Florentine
Rwandatribune.com
