Kuri uyu wa 3 Mutarama 2024, muri Repubulika ya Demokarasi ya Congo, byari biteganijwe ko CENI itangaza amajwi y’Abasenateri, ba Guverineri n’Abadepite ariko kugeza ubu hatangajwe inkuru ivuga ko iri barura ritakibaye kuko aba baruye amajwi bibeshye.
Ibi byagagajwe mu itangazo ryashyizwe hanze na CENI kuri uyu wa 2 Mutarama 2024, bavuga ko kubera ko abakozi babaruraga amajwi bibeshye, ayagomba gutangazwa by’agateganyo kuri uyu wa Gatatu bitagikozwe, ahubwo ko bazamenyeshwa ikindi gihe.
Muri iryo tangazo, CENI yatangaje ko habaye kwibeshya ku majwi y’agateganyo ku mwanya w’Abadepite, haba mu Ntara, ku gihugu ndetse no ku rwego rwa Komine (Commune).
Iritangazo rikomeza risaba aba ba Guverineri n’Abasenateri, kwihanganira izo mpinduka.
Ibi bibaye kandi mu gihe ishyaka rya PPRD, riyobowe na Joseph Kabila Kabange, wahoze ari Perezida muri Repubulika ya Demokarasi ya Congo, rikomeje gutsimbarara ku mahame avuga ko amatora aheruka kuba muri RDC, tariki ya 20 Ukuboza 2023, ko agomba guteshwa agaciro maze agasubirwamo.
PPRD, kuva mu ntangiriro zaya matora bo bavuze ko uburyo amatora arimo gutegurwa butizewe arinabyo byatumye bo batitabira amatora.
Abakandida bahanganye na Tshisekedi, aribo Moïse Katumbi, Martin Fayulu na Dr Denis Mukwege, batemera ibyavuye mu matora bamaze kwiyunga na Joseph Kabila bakaba bari gusaba ko amatora asubirwamo byanze bikunze.
Adeline Uwineza
Rwandatribune.Com
