Karidinali Fridolin Ambongo Besungu, Arkiyepiskopi wa Metropolitan wa Kinshasa muri Repubulika Iharanira Demokarasi ya Kongo, yihanangirije ko ibikorwa bibi mu burasirazuba bw’igihugu bigenda byiyongera cyane, ndetse imitwe yitwaje intwaro iherutse gufata imijyi myinshi yo muri ako karere.
Amakuru aturuka i Vatikani avuga ko Karidinali Fridolin Ambongo Besungu, Arkiyepiskopi wa Kinshasa, Repubulika Iharanira Demokarasi ya Kongo, yatangaje ko afite impungenge z’ubwiyongere bw’ihohoterwa ryibasiye umurwa mukuru wa Kivu y’Amajyaruguru mu burasirazuba bwa DRC, aho umutwe w’inyeshyamba za M23 bafashe intwaro bakikubiraho imijyi myinshi.
Aganira na Fides News, ibiro by’abamisiyoneri ba kiliziya gatolika, Cardinal yagize ati “M23 ikomeje kwigarurira akarere mu gihe ingabo za Kongo ziri mu kajagari ,” kandi ngo “igihangayikishije cyane ni ingaruka z’umutekano muke muri rusange, cyane cyane muri Goma no mu burasirazuba bw’igihugu muri rusange “.
Komiseri mukuru w’umuryango w’abibumbye ushinzwe uburenganzira bwa muntu nawe yagiriye uruzinduko m’uburasirazuba bwa DRC kuva ku ya 16 kugeza ku ya 18 Mata, akarere kuzuyemo urugomo n’ihohoterwa byatumye abantu bagera kuri miliyoni ebyiri bahunga ingo zabo kuva mu mpera za 2021.
Karidinali Ambongo agira ati: “Abepiskopi bo mu ntara ya kiliziya ya Bukavu batanze isesengura risobanutse neza ku byabaye mu burasirazuba bwa Repubulika Iharanira Demokarasi ya Kongo,” nk’uko byagaragajwe mu ibaruwa y’abashumba yasohotse hagati muri Mata.
Afite impungenge z’Itorero ubwaryo riri mu bihe by’akaga muri kariya gace,” kandi ati”niyo mpamvu Abepiskopi bo mu Ntara ya Bukavu, kimwe natwe twese ku rwego rw’igihugu mu nama y’Abepiskopi b’Abanyekongo, bafashe icyemezo cyo guherekeza abaturage ndetse muri iki gihe kitoroshye “.
Yongeraho ko kwita ku bungeri abantu bababaye biduhamagarira kureba “uburyo dushobora kwerekana urukundo ruto n’imbabazi by’Imana kuri aba bantu bababaye,” asoza agira ati “nibyo Itorero rigerageza gukora, ariko ntabwo byoroshye”.
Ku cyumweru tariki 14 Mata nibwo byatangajwe ko Caridinari Ambongo yagiriye uruzinduko mu gihigu cy’Ubutariyani.
Florentine Icyitegetse
Rwandatribune.com
