DRC yananiwe kurangiza ikibazo cya M23 mu nzira y’amahoro, none yayobotse inkiko

Repubulika Iharanira Demokarasi ya Congo yatangaje ko umutwe w’inyeshyamba wa M23 wanze kurambika intwaro hasi,  none bakaba biyemeje gukemura ikibazo cy’izi nyeshyamba hifashishijwe inkiko.

Ibi byatangajwe na Guverineri wa Ituri, Liyetona Jenerali Johnny Luboya N’Kashama ubwo yari yasuye Teritoire ya Bunia yagize ati” Umutwe wose witwaje intwaro udashaka gushyira intwaro hasi kandi udashaka guhagarika ibikorwa byo by’intambara, ugomba koherezwa mu nkiko”

Guverneri yabigarutseho ubwo yari mu ruzinduko rw’amasaha make n’umushinjacyaha w’urukiko mpuzamahanga mpanabyaha ICC, Karim Khan, kuri uyu wa  30 Gicurasi i Bunia, aho batunze agatoki umutwe w’inyeshyamba wa M23 ko wigize akaraha kajyahe muri iki gihugu.

Liyetona Jenerali Johnny Luboya

Yakomeje avuga ko bagomba guhagarika umuco wo kudahana no guhonyora uburenganzira bwa muntu.

Yerekanye ko kuba umushinjacyaha Karim Khan yaje  muri Ituri ari ubutumwa bukomeye ku bicanyi bose batekerezaga ko bafite umudendezo, kandi ko bafite umwanya wo gukora ibyaha.

Porocureri wa CPI i Bunia

Yongeyeho ati”Tugomba guhagarika uku kudahana. Tugomba guhagarika iryo hohoterwa. Hano turi uyu munsi, twakoze byose kugira ngo umushinjacyaha ave i Rahe aze hano, kugirango abo bicanyi bose batekerezaga ko bafite umudendezo, bamenye ko dukurikira inzira  y’amategeko  kandi ko ntakizabihindura ”.

Liyetona-jenerali Johnny Luboya yahise  yoherereza  ubutumwa imitwe yitwaje intwaro itandukanye ikomeje guhohotera abaturage b’inzirakarengane .

uyu mu Jenerali yatangaje ko abananiwe gushyira intwaro hasi ngo bahagarike intambara bitegure ko tugiye kubashyikiriza inkiko.

Uwineza Adeline