Leta ya Repubulika ya Demokarasi ya Congo yasobanuye impamvu itagombaga gutumira Umunyamabanga Mukuru w’Ibihugu bikoresha ururimi rw’igifaransa I Kinshasa ngo kuko ariwe nyirigikorwa.
Ibi byasobanuwe na Minisitiri w’ububanyi n’amahanga wa DRC, Christophe Lutundula, mu kiganiro yagiranye na Radiyo mpuzamahanga y’Abafaransa RFI kuri uyu wa Gatatu 26 Nyakanga 2023, Ubwo yabajijwe impamvu atatumiye Mushikiwabo, asubiza ko atari kumutumira kuko OIF ayobora ari yo itegura iyi mikino.
Lutundula, ati: “Nta butumire bwihariye twari guha Umunyamabanga Mukuru wa OIF. Ntabwo dutumira umuntu utegura.”
Guverinoma y’iki gihugu, ikimara gutangaza ko Mushikiwabo azitabira iyi mikino, Umuvugizi we, Oria Vande Weghe, kuwa 25 Nyakanga 2023 yahise atangaza ko atazajya i Kinshasa kubera ko atatumiwe nk’uko biteganyirizwa Umunyamabanga Mukuru w’uyu muryango.
Yagize ati: “Igihugu kiri gutegura amarushanwa cyoherereza ubutumire ibihugu ariko kikanohereza ubutumire ku Munyamabanga Mukuru. Minisitiri w’ububanyi n’amahanga nk’uko yari yabivuze mu nama rusange yaratuvugishije kugira ngo hemezwe umunsi azabuzaniraho ariko nyuma baje kuvuga ngo imikino n’ubundi ni iyanyu ntabwo akeneye ubutumire.”
Imikino ya OIF izatangira tariki ya 28 Nyakanga 2023, irangire ku ya 8 Kanama 2023.
Abarimo Senateri Muyumba Francine, yanenze kuba Republika ya Demokarasi ya Congo, itaratumiye umunyamabanga mukuru wa Francophonie Louise Mushikiwabo.
Ati: “Iri nikosa rya diplomasi kuri Kinshasa, bari bakwiye gukora ubutumire bwiza kandi bukagenda igihe gikwiye. Mushikiwabo ntabwo yanze kwitabira ahubwo yanenze ibyo DRC yakoze kandi ibyo ubutegetsi bwa Congo bwakoze butesha agaciro Igihugu cyose.”
Senateri Muyumba Francine, akomeje kunenga igihugu cye, ko kidafite Dipolomasi yagutse ugereranyije n’ibindi bihugu.
Uwineza Adeline
