Imyiragambyo ikomeye y’Abarwanashyaka b’Ishyaka UNC ryashyinzwe na Vital Kamerhe biraye mu mihanda basaba ko afungurwa nta yandi mananiza bakaba bavuga ko ibyo aregwa ari ibinyoma bishingiye kuri Politiki
Vital Kamerhe yatawe muri yombi mu ijoro ryo ku wa 8 Mata akaba afungiwe muri Gereza ya Makala i Kinshasa, nyuma yo gushyirirwaho impapuro zimuta muri yombi n’Umushinjacyaha Mukuru. Akurikiranweho kunyereza amafaranga ya Gahunda y’Iminsi 100 yashyizweho na Perezida Tshisekedi.
Impamvu Vital Kamerhe yaba yafunzwe ni uko yanze kwitaba umushinjacyaha tariki ya 6 Mata nk’uko yari yabihamagariwe. Umushinjacyaha yabifashe nk’agasuzuguro yaba yaratewe n’icyubahiro afite ku butegetsi bw’Umukuru w’Igihugu.
Bwana Kamerhe w’imyaka 59, yahamagajwe ngo abazwe ibijyanye n’imishinga y’ibikorwa remezo ya Perezida Tshisekedi yise “programme d’urgence de 100 jours”.
Iyi ni imishinga yihutirwa y’ubwubatsi bw’ibikorwa byari bikenewe cyane na mbere y’uko hashyirwaho guverinoma, ubwo Bwana Tshisekedi yari amaze gutsinda amatora mu mpera za 2018.
Vital Kamerhe wari umuyobozi w’ibiro bya Perezida Félix Tshisekedi kuva mu kwezi kwa mbere 2019, nyuma y’amasaha ane abazwa n’umucamanza yari yitabye, yahise afungwa.
Umunyamakuru wa Rwandatribune.com uri iGoma avuga ko guhera none kuwa 09 Mata abarwanashyaka b’Ishyaka rya Vital Kamerhe UNC bahise birara mu mihanda barabyamagana.
Imyigaragambyo yahereye I Goma muri Komini Kalisimbi, Katindo na Sake, si aho gusa yakomereje no mu Ntara ya Kivu y’Amajyepfo mu mujyi wa Bukavu no muri Teritwari ya Walungu aho abaturage bahanganye na Polisi yifashisha bya byuka biryana mu maso, abo barwanshyaka bakaba basaba Leta ya Congo kurekura Vital Kamerhe nta yandi mananiza.
Mu gihe abarwanashyaka bakomeje gusaba Leta ya Congo ko yarekura Vital Kamerhe amakuru dukesha Ubuvugizi bwa Polise ya Congo, aravugako Fulgence Baramos wari ushinzwe ikigo gishinzwe ibijyanye n’imihanda FONER na we yatawe muri yombi nyuma ya Vital Kamerhe
Ni muntu ki Kamerhe?
Ubwo yari umunyeshuri muri kaminuza ya Kinshasa mu 1984, nibwo Vital Kamerhe Lwa Kanyiginyi Nkingi yatangiye politiki mu ishyaka UDPS ryari irya Étienne Tshisekedi wa Mulumba.
Guhera mu myaka ya 1990 yatangiye kubona imyanya ya politiki muri leta. Bikekwako yaba yari ashyigikiye Perezida Mobutu Sese Seko nubwo yagiye aba mu mashyaka atavuga rumwe n’ubutegetsi bwe.
Ku butegetsi bwa Laurent-Désiré Kabila nabwo yahawe imyanya itandukanye ya politiki.
Mu 2002 yagize uruhare runini mu biganiro bigamije gushaka amahoro mu burasirazuba bwa DR Congo.
Mu 2004 yagize uruhare mu kwamamaza Joseph Kabila no kumugeza ku ntsinzi mu matora, nawe atorerwa kuba umudepite i Bukavu, mu 2006 atorerwa kuba Perezida w’inteko ishinga amategeko.
Icyo gihe yari mu ishyaka PPRD yagize uruhare mu gushinga riyoborwa na Joseph Kabila Kabange.
Mu 2009 yashwanye na Perezida Joseph Kabila, avuga ko guverinoma yemereye ingabo z’u Rwanda kwinjira muri “operations Umoja Wetu” mu burasirazuba bwa Congo, itabimenyesheje Inteko.
Muri uwo mwaka yeguye ku mwanya we, mu 2011 yiyamamarije kuba Perezida wa Repubulika mu ishyaka rye UNC, aratsindwa ku majwi 7% yabonye.
Mwizerwa Ally
