Intambara yafashe indi ntera hagati ya M23 ingabo za ONU (MONUSCO) ndetse n’ingabo za Leta ya DRC (FARDC). Iyi mirwano yatangiye mu gicuku cyo kuri uyu wa 22 Gicurasi igakomeza mu rukerera rwo kuri uyu wa mbere ndetse ingabo za ONU zinjiye muri iyi ntambara na kajugujugu n’imbunda za rutura nyuma yo gushinja M23 kubagabaho ibitero.
Nkuko byatangajwe mu butumwa bwacishijwe kuri Twitter, MONUSCO ivuga ko M23 yabateye ikanatera ingabo za leta ahitwa Shangi muri teritwari ya Rutshuru ariko ko ingabo za ONU zabasubije inyuma.
Nyamara M23 na yo ivuga ko ku Cyumweru mu gicuku ari yo yatewe n’ingabo za leta zifatanyije n’inyeshyamba za Mai Mai na FDLR, nyuma MONUSCO na yo ikinjira mu mirwano na za kajugujugu.
Ni mugihe ejo Ku Cyumweru, imirwano ikomeye yabereye mu bice bya Bikenke, Shangi, Runyoni, Kavumu muri groupement ya Jomba muri teritwari ya Rutshuru yatumye abaturage babarirwa mu magana bahunga ingo zabo, bamwe bakajya hakurya muri Uganda.
Nk’uko umuvugizi wa M23, Major Willy Ngoma yabwiye BBC dukesha iyi nkuru, yavuze ko kuva saa kumi z’igitondo none ku wa mbere bakomeje kuraswaho na MONUSCO, ingabo za leta, n’inyeshyamba zirimo kuyifasha.
Mu butumwa bw’amajwi yatanze mu ijoro ryo kuri iki cyumweru, Willy Ngoma yari yavuze ko indege za kajugujugu za MONUSCO “zarashe mu buryo bukomeye” ku birindiro byabo.
Madame Bintou Keita intumwa y’umunyamabanga mukuru wa ONU muri DRCongo yamaganye ibitero bya M23 ku ngabo za leta n’iza MONUSCO nk’uko bivugwa n’itangazo ry’izi ngabo.
Madame Keita yasabye M23 “guhagarika imirwano ako kanya” ikajya mu bikorwa byo gushyira intwaro hasi biri mu byemejwe n’abakuru b’ibihugu bigize Umuryango wa Afurika y’Iburasirazuba mu biganiro bagiranye i Nairobi.
Icyakora kugeza ubu ingabo za Leta ntacyo zari zatangaza ku byerekera n’ibi zishinjwa na M23 ko zo na MONUSCO babateye.
Yves UMUHOZA
RWANDATRIBUNE.COM
