Abarenga 68 mumfungwa zari muri gereza ya Ecuador (Equateur ) basize ubuzima mu mirwano mishya yabaereye muri iyo gereza . aha kandi niho imfungwa zirenga ijana zapfiriye mu mirwano hagati y’ibico (amatsinda) by’abacyeba mu kwezi kwa cyenda, nkuko abategetsi babivuga.
Amakuru avuga ko imidugararo muri gereza ya Litoral Penitentiary (Penitenciaría del Litoral) mu mujyi wa Guayaquil yatangiye ku wa gatanu nimugoroba.
Amakuru avuga kandi ko imitwe yihariye yo muri polisi yinjiye mu nyubako z’iyo gereza ikahasanga imbunda, ibiturika n’inzembe (urwembe).
Imibare igaragaza ko imfungwa hafi 300 ari zo zimaze gupfa kugeza ubu muri uyu mwaka mu magereza yo muri iki gihugu cyo muri Amerika y’epfo.
Bamwe mubagize imiryango ifite abayo bafungiye mur iyi gereza bategerereje hanze ya gereza bahangayitse ngo bamenye amakuru y’ababo
Urugomo ruvuye ku bushyamirane hagatiy’amatsinda y’imfungwa rwo mu kwezi kwa cyenda ni rwo rwa mbere rwahitanye abantu benshi muri gereza mu mateka y’iki gihugu.
Icyo gihe, imfungwa zo mu gice kimwe cya gereza zagendesheje inda zinyura mu mwobo kugira ngo zigere mu kindi gice cyayo, aho zagabye igitero ku bagize itsindary’abacyeba.
Abashinzwe umutekano n’abasirikare bose hamwe babarirwa mu magana ni bo bari boherejwe kuri iyo gereza kugira ngo basubize ibintu mu buryo.
Iyo mirwano yo mu kwa cyenda, aho imfungwa zimwe zishwe ziciwe imitwe, yatumye hongera kwibazwa ku kugira ijambo gukomeje kwiyongera muri Ecuador kw’amatsinda y’abagizi ba nabi barimo nk’amatsinda yo muri Mexico (Mexique) aya Sinaloa na Jalisco New Generation.
Iyi mirwano mishya muri iyi gereza yo mu mujyi wa Guayaquil, mu ntara ya Guayas, yanakomerekeyemo abantu 25, ndetse ibaye ikurikira ubushyamirane buto burimo ikoreshwa ry’imbunda bwabaye mu ntangiriro y’uku kwezi aho imfungwa eshatu zishwe zirashwe.
Hari amakuru ko habaye urundi rugomo kuri iyo gereza ku mugoroba wo ku wa gatandatu, ndetse ko abasirikare bahagabwe ngo bunganire inzego zishinzwe umutekano, bakigarurira hanze y’iyo gereza bari mu modoka z’umutamenwa.
Abasirikare bari mu modoka z’umutamenwa bari hafi ya gereza yo mu mujyi wa Guayaquil
Inshuti n’abo mu miryango y’imfungwa bari hanze y’iyi gereza bategereje bahangayitse amakuru y’ababo, aho urutonde rw’amazina y’abapfuye rwamanitswe ku cyapa.
Abategetsi bavuze ko uru rugomo rwatangiye nk’ubushyamirane bushingiye ku butaka hagati y’amatsinda y’abacyeba nyuma yuko umukuru witsinda rimwe yari amaze kurekurwa.
Pablo Arosemena, Guverineri w’intara ya Guayas, yabwiye abanyamakuru ati: “Mu gihe iki gice cya gereza kitari gifite umukuru witsinda,ayandi matsinda yagerageje… kwinjira ngo akore ubwicanyi bwuzuye”.
Yavuze ko hari hari imfungwa zigera hafi kuri 700 muri ako gace ka gereza kari karimo kuberamo iyo midugararo yiciwemo imfungwa.
Mu itangazo rigufi kuri Twitter, Pereza wa Ecuador Guillermo Lasso yihanganishije “imiryango yabuze abayo”, anavuga ko ingamba nshya zicyenewe mu “kurwanya abagizi ba nabi bungukira mu kajagari”.
Mu kiganiro na BBC dukesha iyi nkuru ,yavuze ko mu ntangiriro y’uku kwezi, Bwana Lasso yashimangiye ko leta ye irimo kwisubiza atari gusa amagereza ahubwo n’uduce twa Ecuador abacuruzi b’ibiyobyabwenge bari baragize indiri yabo.
Yashinje za guverinoma zabanje muri iki gihugu “kutagira icyo zikora” ku bucuruzi bw’ibiyobyabwenge, ariko aburira ko guhangana n’ubwiyongere bw’ikoreshwa ry’ibiyobyabwenge mu gihugu kuzafata “imyaka irenga icumi”.
Yanavuze ko Ecuador izacyenera ubufasha bw’amahanga bw’ibihugu nka Colombia bihana imbibi, Amerika n’umuryango w’Ubumwe bw’Uburayi (EU/UE) mu kongerera imbaraga igisirikare cyayo na polisi ngo bishobore kurwanya ukwiyongera kw’imbaraga zamatsinday’abagizi ba nabi.
Muri iki gihe mu magereza ya Ecuador harimo imfungwa zirenga hafi 9,000 ku bushobozi bwazo, nkuko abategetsi babivuga. Gereza ya Litoral Penitentiary yubakiwe kwakira imfungwa 5,300, ariko ubu ifungiwemo 8,500.
M.Louis marie
