Ese kongerera Etat de siege igihe byaba ariwo muti wo kurwanya M23 ?

Imirwano ihanganishije umutwe w’inyeshyamba wa M23 na FARDC hamwe n’abambari bayo ikomeje gufata indi ntera mu ntara zimwe na zimwe zo mu Burasirazuba bwa Congo, zirimo Kivu y’Amajyaruguru, Ituri n’izindi, byatumye Etat de siège yongererwa igihe muri izi ntara.

Ibi byatumye  Inteko Ishinga Amategeko muri  Repubulika ya Demokarasi ya Congo, yongera guterana kuri uyu wa 29 Ugushyingo 2023, maze  yongerera  igihe état de siège mu Ntara ya Kivu y’Amajyaruguru na Ituri kugirango  bahangane n’umutwe w’Inyeshyamba wa  M23 ukomeje kuzengereza izi ntara.

Ibi kandi byatangajwe n’iyi  Ntego Ishinga Amategeko nyuma y’uko bari barangije i Nama, i Kinshasa, mu murwa Mukuru wa DRC. Bavuze ko Ubutegetsi bwa Gisirikare babwongereye igihe mu rwego rwo guhangana  n’umutwe w’inyeshamba wa M23 umaze igihe kirekire  uhanganye n’ingabo za Repubulika ya Demokarasi ya Congo, muri Teritwari ya Masisi, Nyiragongo na Rutshuru, mu Ntara ya Kivu Y’Amajyaruguru.

Gusa Abategetsi benshi barimo  Abadepite n’Abaturage baturiye Intara ya Ituri n’iya  Kivu y’Amajyaruguru, bagiye basaba kenshi Kinshasa  gukuraho  Ubutegetsi bwa état de siège, kuko ntacyo bumaze, ngo dore ko kuva bwajyaho nta mpinduka n’imwe bwigeze buzana.

Bagakomeza bavuga  ko mu Ntara ya Ituri kuva Ubutegetsi bwa état de siège bwajyaho ubwicanyi ntibwigeze buhagarara ahubwo  bwarushijeho kwiyongera. Batanze urugero k’umutwe  w’inyeshyamba wa ADF wica Abasivile umunsi k’umunsi kandi iyo Etat de Siège ihari.

Ikindi  muri Kivu y’Amajyaruguru naho  imirwano igakomeza gufata indi ntera aho umutwe w’inyeshyamba wa M23 ugenda wigarurura ibice byinshi  umunsi k’umunsi, ibi byose bikaba byemeza ko  Etat de siege ntacyo imariye izi ntara zombi, ko ahubwo yakurwaho bagasubizaho Ubutegetsi bwa Gisivile.

Abasesenguzi mu bya Politiki bo bavuga ko kongerera Etat de siege igihe ataribyo bizarangiza ikibazo cy’intambara ya M23 na FARDC, ko ahubwo bakwiye kuyoboka inzira y’ibiganiro ko ari cyo  gisubizo cyo kuyirangiza,  ngo cyane ko kuva yajyaho ibintu byarushijeho kuzambagurika, bisobanuye ko bashakira igisubizo aho kitari.

Adeline Uwineza

Rwandatribune.Com