Umuryango w’Ubumwe bw’Uburayi (EU) watanze ikirego mu rukiko urega uruganda rwa AstraZeneca rukora inkingo za Covid-19.
Ishami ry’ubutegetsi rya EU ryavuze ko ryareze AstraZeneca kubera kutubahiriza ibyo iyi kompanyi yiyemeje mu masezerano yo kugeza urukingo muri EU, no kutagira gahunda “yizewe” yo gutuma inkingo zihagera ku gihe.
Uruganda rwa AstraZeneca rwavuze ko icyo kirego “nta shingiro gifite”.
Icyo kirego kigejeje ku yindi ntambwe ubushyamirane bumaze igihe hagati y’impande zombi ku bijyanye no gutanga inkingo za Covid-19.
Hari bamwe mu banyamuryango ba EU bavuze ko uruganda rwa AstraZeneca (ruhuriweho n’Ubwongereza na Sweden) rubogamiye ku Bwongereza ariko rwo rwarabihakanye.
Hagati aho, Amerika yatangaje ko izasaranganya n’ibihugu by’amahanga doze miliyoni 60 z’urukingo rwa AstraZeneca uko zizagenda ziboneka.
Izo nkingo zizoherezwa mu mezi ari imbere, nyuma yo kugenzurwa ubuziranenge n’ikigo cya leta, nkuko bitangazwa n’ibiro ntaramakuru AP.
Amerika ifite umurundo w’urwo rukingo, nubwo abagenzuzi b’ubuziranenge bw’imiti batararwemeza ko rwakoreshwa ku baturage bayo. Hari bamwe bamaze igihe banenga iki gihugu kwigwizaho inkingo, mu gihe ibindi bihugu bizicyeneye cyane.
Umuvugizi w’akanama ka EU yavuze ko icyo kirego cyatanzwe ku wa gatanu, gishyigikiwe n’ibihugu binyamuryango bya EU byose uko ari 27.
Kigendeye ku masezerano kashyizeho umukono mu kwezi kwa munani mu 2020 kuri doze miliyoni 300 z’urukingo rwa Oxford-AstraZeneca, arimo n’ingingo yuko bishoboka ko ako kanama kabona na doze zindi miliyoni 100.
Mu ntangiriro y’uyu mwaka, AstraZeneca yavuze ko ingano y’inkingo zayo izagabanuka kubera ibibazo byabayeho mu kuzikora.
Kuri doze miliyoni 80 urwo ruganda rwateganyaga gutanga mu mezi atatu ya mbere ya 2021, doze miliyoni 30 gusa ni zo zoherejwe.
Nkuko akanama ka EU kabivuga, biteganyijwe ko kompanyi AstraZeneca itanga doze miliyoni 70 mu mezi atatu akurikiyeho y’uyu mwaka wa 2021, aho kuba doze miliyoni 180 zari ziteganyijwe mbere.
Umuvugizi w’akanama ka EU yagize ati: “Ibikubiye muri ayo masezerano ntibyubahirijwe”.
“Turashaka gutuma habaho gutanga byihuse umubare uhagije wa doze… zasezeranyijwe bijyanye n’ibikubiye mu masezerano”.
Komiseri ushinzwe ubuvuzi mu kanama ka EU Stella Kyriakides, yanditse kuri Twitter ko icyihutirwa cyane kuri aka kanama ari “ugutuma inkingo za Covid-19 zitangwa mu kurinda ubuzima bw’umuryango w’Ubumwe bw’Uburayi”.
Yanditse ati: “Buri doze yose y’urukingo ifite akamaro. Buri doze yose y’urukingo irokora ubuzima”.
Umutegetsi umwe wo muri EU yabwiye ibiro ntaramakuru Reuters ko icyo cyemezo cyafashwe mu rwego rwo “guha ubutumwa” umukuru wa AstraZeneca Pascal Soriot.
