Umuyobozi wa Batayo 121 y’abakomando mu ngabo za Repubulika iharanira Demokarasi ya Congo FARDC, Col Andre Ekembe yavuze ko birukanye abarwanyi b’ihuriro ry’imitwe ya Gumino na Twirwaneho iyobowe na Col Michel Rukunda (Makanika) mu gace ka Kamambo kari muri Teritwari ya Fizi mu ntara ya Kivu y’Amajyepfo.
Yagize ati “Turi muri Kamambo, umwanzi yahunze ,twatangiriye imirwano muri Mikarati , ubu bahungiye muri Nyamara .Turacyari muri Kamambo hamwe n’abasivile bari barihishe mu bihuru , bose bameza neza , bagarutse ubwo twahageraga, kandi twiteguye gukurikira umwanzi aho yahungiye ,niyo mpamvu dusaba abaturage gutuza kubera ko turahari ngo tubarinde.”
Mu gitondo cyo ku wa 27 ukuboza nibwo ingabo za DRC zatangaje ko zagabweho igitero n’inyeshyamba za Gumino na Twirwaneho zari ziyobowe na Col Makanika muri Kamambo bicamo Col Yaounde Kyembe n’abandi basirikare batatu , bakomeza kubakurikira babageza muri Mikarati mu bilometero 12.
Imboni ya Rwandatribune iherereye mu gace ka Kamambo yatubwiyeko ubu FARDC yigaruriye agace ka Kamambo kari muri Tertwari ya Fizi mu ntara ya Kivu Y’Amajyepfo, ibi bikaba bibaye nyuma y’uko Umuvugizi mu bikorwa bya Gisirikare mu ntara ya kivu y’amajyepfo , Major Dieudonne Kasereka kuwa 28 ukuboza yatangaje ko ingabo za FARDC zigiye gufata ingamba nshya zo kurwanya ziriya nyeshyamba kugeza ubwo igisirikare cya leta ya congo kigomba kwigarurira imijyi yafashwe n’inyeshyamba.
Uyu muvugizi kandi yakomeje avugako yakomeje gukora isuzuma nyuma yakiri gitero cyo kuwa 27 Ukuboza 2021, aza gusanga FARDC nayo yarishe abarwanyi 16 ba Col Makanika .
Uwineza Adeline
