Amakuru dukesha isooko ya Rwandatribune iri ahitwa Bishusha ni muri Teritwari ya Nyamuragira Zone ya Rutchuro, aravuga ko mu nama iherutse kuba kuwa 31 Gicurasi yemeje Col.Mazizi ko ariwe ugomba kuyobora ikinyamakuru cya FDLR intabaza.com n’ikindi cyitwa urugaga.org.
Iyi nama kandi yari igamije gukemura amakimbirane amaze imyaka myinshi muri uyu mutwe aho Lt.Gen Byiringiro Victor na Gen Major Omega badacana uwaka buri wese ashinja undi kwikubira umutungo w’icyama,sibyo gusa Gen.Omega yifuza ko Gen.Byiringiro yajya mu zabukuru agasimbuzwa Henganze usanzwe akuriye iperereza muri FDLR.
Umwe mu begereye Gen.Matovu waganiriye n’isoko y’amakuru ya Rwandatribune.com atifuje ko amazina ye atangazwa ku bw’umutekano we avuga ko iyi nama ku bijyanye n’amakimbirane nta cyagezweho habaye gucengacengana mu mvugo, bamwe bakaba barashinjanye ubugambanyi aho Col.Ruhinda ushinzwe CRAP bamushinja kuvugana na Kayumba Nyamwasa ndetse hari n’amakuru bafite ko uyu Ruhinda yaba yitegura gutorokana abarwanyi benshi akabajyana muri Uganda.
Mu makuru ikinyamakuru cya Rwandatribune.com gifitiye gihamya ni uko Col.Ruhinda avugana mu ibanga na Dr.Gedeo Rugali na Bishop Busigo bose bari muri Uganda akaba ari abambari ba RNC. Ikindi ni uko Col Ruhinda yatangiye kwimura abagize umuryango aho yabavanye mu mujyi wa Goma abajyana muri Uganda.
Col Mazizi wagizwe Umuyobozi w’ibitangazamakuru muri FOCA ni muntu ki?
Col Mazizi amazina ye y’ukuri ni Rutiganda Yohani Damascene, avuka mu cyahoze ari Komini Murama ubu ni mu Karere ka Ruhango, Intara y’amajyepfo,muri Jenoside yakorewe abatutsi Col Mazizi yari Burugumestre wa Komini Murama, akoreshya amazina ya Donat Gapyisi ku rukuta rwe rwa facebook rukunda gushyirwaho ibitekerezo by’ubuhezanguni nk’umuntu wakoze jenoside ndetse n’ikinyamakuru intabaza.com iyo ugisomye usanga ku bantu bajyanye n’igihe turimo nta kintu bakuramo kuko cyuzuye ivanguramoko no gupfobya jenoside, n’ingengabitekerezo yayo.
Mu mwaka wa 1996 yinjiye mu ALIR mu gihe cy’abacengezi yari asanzwe ari Komanda QJ (quartier general) mu birindiro bya Gen. Omega, impamvu yizewe muri FDLR ni uko yakatiwe n’inkiko gacaca za Murama,igifungo cya burundu kubera ubwicanyi bityo kuba ntaho yatorokera niyo mpamvu yizerwa na Gen Omega.
Mwizerwa Ally
