Ishyirahamwe ry’umupira w’Amaguru mu Rwanda (FERWAFA) ryamaze kwemeza ko umukino wa Super Cup uhuza ikipe yatwaye Igikombe cya Shampiyona n’iyatwaye Igikombe cy’Amahoro, uzaba tariki ya 1 Ukwakira kuri Stade Amahoro.
Uyu mukino uba mbereho icyumweru ngo Shampiyona itangire, uzahuza Rayon Sports yatwaye Shampiyona y’umwaka ushize w’imikino na AS Kigali yatwaye Igikombe cy’Amahoro 2019.
Impamvu nyamukuyu yo ayatumye bashyira uyu mukino ku itariki ya 1 Ukwakira 2019 ni uruhurirane rw’imikino itandukanye yagiye iba hakurikijwe ingengabihe ya FIFA na CAF nk’uko itangazwa na Bonnie Mugabe, umuyobozi ukuriye komisiyo ishinzwe gutegura amarushanwa muri FERWAFA
Yagize ati “Bitewe n’imikino ya FIFA na CAF yegeranye, Super Cup ibanziriza itangira rya Shampiyona ya 2019/20 izaba tariki ya 1 Ukwakira, habura iminsi itatu ngo umwaka mushya w’imikino utangire. Twasanze ari wo mwanya ushobora kuboneka ku buryo amakipe yombi yakina”
Mu marushanwa ya CAF ateganywa, ikipe y’igihugu Amavubi izakirwa na Ethiopia mu ijonjora rya nyuma rya CHAN 2020 mu mukino ubanza uzaba tariki ya 22 Nzeri.
AS Kigali yanganyirije na Proline i Kigali igitego 1-1 mu mukino ubanza wabaye kuri uyu wa Gatandatu, yo ifite umukino wo kwishyura muri Uganda tariki ya 28 Nzeri.
Ikipe izegukana SuperCup y’uyu mwaka izahabwa miliyoni eshanu z’amafaranga y’u Rwanda n’igikombe.
Umwaka ushize iki gikombe cyatwawe na APR FC itsinze Mukura Victory Sports ibitego 2-0 mu mukino wabereye kuri Stade Umuganda i Rubavu.
Hakorimana Christian
