Icyegeranyo kiswe “ Ubwisanzure kw’isi mu bijyanye n’uko amatora akorwa” cyasohotse muri uyu mwaka wa 2022 gikorwa n’ishirahamwe mpuzamahanga rizwi nka Freedom House, cyashinje Ishyaka CNDD-FDD riri ku Butegetsi mu Burundi gukoresha igitugu n’ubugizi bwa nabi kugirango ribashe kujya ku butegetsi no gutsinda amatora y’umukuru w’igihugu yabaye mu 2020.
Freedom House, ikomeza ivuga ko kugirango ubutegetsi bujyeho n’ amatora yatumye hashirwaho inzego zikomeye mu Burundi, byabanjirijwe no guhohotera ikiremwamuntu , kubogama no kubangamira ubwisanzure bw’abanyapolitiki batavuga rumwe n’ubutegetsi ngo kuko hari benshi bafunzwe, abandi baricwa mu gihe abandi baburiwe irengero .
Iki cyegeranyo gikomeza kigaragaza ko, ibi byose byakozwe n’Ishyaka CNDD-FDD riri ku butegetsi mu Burundi ribifashijwemo n’Inzego zishinzwe iperereza, igisirikare, igipolisi n’imbonerakure ndetse ko n’indorerezi mpuzamahanga zangiwe gukora akazi kazo n’ishyaka NCDD-FDD riri ku butegetsi mu Burundi kugirango rihishire amakosa yarimo akorwa mu matora yo 2020 .
Ibi byatumye Freedom House iha Uburundi amanota angana 1/16 mu bijyanye n’ubwisanzure kw’isi ku buryo amatora akorwa mo.
HATEGEKIMANA Claude
Rwandatribune.com
