Bobi Wine w’imyaka 38 uzwi ku mazina y’ukuri Robert Kyagulanyi Ssentamu , umwe mu banyapolitiki barwanya ubutegetsi bwa Perezida Museveni ndetse unakunzwe cyane ,arashinja Perezida Museveni gucura umugambi agamije gutesha agaciro kanditatire ye k’umwanya w’umukuru w’igihugu mu matora ateganyijwe umwaka utaha wa 2021.
Bobi Wine avuga ko Perezida Museveni abikora yihishe inyuma y’ubutabera n’iterabwoba akoresheje inzego z’ubuyobozi bwa gisivili n’ubwa Gisirikare atibagiwe n’itangazamakuru ribogamiye k’uruhande rwa guverinoma ye.
Ibi Bobi Wine abivuze nyuma yaho urukiko Rwisumbuye rwa Kampala rukomeje ku mukurikirana ku birego biherutse kuzamurwa n’abayoboke babiri b’ishyaka NUP Bobi Wine abereye umuyobozi bamushinja ko gutorwa kwe k’umwanya w’umukuru w’ishyaka rya NUP mu ntangiriro z’uyu mwaka ,kutakurikije amategeko. Ibintu Bobi Wine ahamya ko ari umugambi wacuzwe na Perezida Museveni agamije ku mushumuriza ubutabera mu cyo yise akarengane.
Urukiko ni ruramuka rwemeje ko gutorwa kwa Bobi Wine ku mwanya w’umuyobozi mukuru w’ishyaka NUP kutakurikije amategeko Bobi Wine ntazaba yemerewe kwiyamamariza umwanya w’umukuru w’igihugu mu matora ateganyijwe umwaka wa 2021
Mu kwezi gushize kandi ibinyamakuru by’imbere mu gihugu bibogamiye kuri Leta byari byanditse ko kanditatire ya Bobi Wine irimo ihura n’imbogamizi biturutse ku kuba yarabeshye imyaka ye y’amavuko no kudasobanura neza impamyabumenyi z’amashuri yize.
Bobi Wine avuga ko asaba abaturage b’isi yose guhanga amaso igihugu cya Uganda avuga ko igitutu mpuzamahanga aricyo cyonyine cyabasha guhagarika akarengane arimo akorerwa n’ubutegetsi bwa Museveni.
Yagize ati:”Dufite abaturage benshi baturinyuma , Nidutsindwa muri Uganda, bizaba ari ugutsindwa k’ubutabera, Demokarasi n’itegekonshinga rya Uganda.”
Abakurikiranira hafi politiki yo mu gihugu cya Uganda bavuga ko Perezida Museveni w’imyaka 76 y’amavuko akomeje guterwa ubwoba n’umubare w’urubyiruko rukomeje gukurikira no gushyigikira Bobi Wine , aho 70% by’urubyiruko rwo mu Cyaro rwagaragaje ko rushigikiye Depute Robert Kyagulanyi Ssentamu bakunze kwita Bobi Wine.
Kuva yatorerwa kuba umudepite mu mwaka wa 2017 Bobi Wine yakunze kunenga ku mugaragaro ubutegetsi bwa Perezida Museveni ndetse bituma yigarurira imitama y’abagande batari bake cyane cyane urubyiruko.
Ibi byatumye akunda guhora atabwa muri yombi n’inzego zishinzwe umutekano za Uganda ndetse rimwe na rimwe agafungwa.
Hategekimana Claude
