Lt Gen Muhoozi Kainerugaba abinyujije ku rukuta rwe rwa twitter ,yanditse ko nyuma y’uko yari aherutse gusura u Rwanda akaganira na Perezida Kagame yita ‘Uncle’(Nyirarume), yongeye gutangaza ko mu minsi micye iri imbere azongera kugaruka mu Rwanda.
Yavuzeko nyuma y’aho aviriye mu Rwanda, yakomeje kuganira na Perezida Kagame none bemeranyije ko Lt. Gen Muhoozi Kainerugaba azagaruka gusura u Rwanda bakaganira ku zindi ngingo zireba umubano mwiza hagati ya Kigali na Kampala.
Akomeza ati: “ Nyuma y’uko kuganira na Marume, Perezida Kagame, mu gitondo cy’uyu munsi twemeranyije ko nzagaruka mu Rwanda mu minsi micye iri imbere tukaganira ku bibazo bisigaye bireba Uganda n’u Rwanda.”
Urugendo rwa Muhoozi aherukamo mu Rwanda rwagize akamaro kubera ko akigera iwabo umugabo witwa Major General Abel Kandiko u Rwanda rwashinjaga gukorera iyicarubozo abaturage barwo baba muri Uganda yahise akurwa mu kazi.
Bidatinze kandi u Rwanda narwo rwatangaje ko rufunguye umupaka waruhuzaga na Uganda wa Gatuna kandi uyu niwo mupaka wakoreshwaga cyane.
Abakurikiranira hafi impinduka zakozwe ku ruhande rwa Uganda bavuga ko benshi mu bayobozi bo mu nzego z’ubutasi habaye impinduka zikomeye,zakorewe bamwe mu bayobozi bavugwagaho gukorana na RNC,izi mpinduka zikaba zarakozwe mu bigo bya CMI na ISO,kuva ku rwego rw’igihugu,kugera mu rwego rw’uturere.
Mwizerwa Ally
