Umunyamabanga mukuru w’umutwe wa RNC ufatwa na leta y’uRwanda nk’umutwe w’iterabwoba Gervais Condo ntiyorohewe na bimwe mu bikomerezwa bya RNC by’umwihariko Kayumba Nyamwasa na muramu we Frank Ntwari.
Ni nyuma y’aho aba bagabo bombi baba bamaze iminsi bongorera bamwe mu banyamuryango ba RNC, bababwira ko Gervais Condo ashobora kuba ariwe wagambaniye Ben Rutabana waburiwe irengero guhera mu ntangiriro z’umwaka wa 2020.
Kuri ubu ngo abayoboke ba Kayumba Nyamwasa iyo bahuriye mu tubari dutandukanye nta kindi kiganiro usibye kwibasira Gervais Condo bavuga ko batandukanye nawe nyuma y’aho babwiriwe na Kayumba Nyamwasa ko Gervais Condo, Umunyamabanga mukuru wa RNC ariwe wagambaniye Ben Rutabana akaba yaraburiwe irengero.
Ku rundi ruhande ariko hari abandi batemeranya na Kayumba Nyamwasa n’abayoboke be bavuga ko ibi bizanywe na Kayumba byo kugereka urusyo kuri Gervais Condo ari amayeri yo kujijisha abanyamuryango ba RNC batagifitiye icyizere Kayumba Nyamwasa mu rwego rwo kugerageza kumutagatifuza no kumuhanaguraho icyashya kubera akaboko ke mu ibura rya Ben Rutabana , nk’uko byakunze kwemezwa n’abanyamuryango benshi ba RNC.
Bakomeza bavuga ko n’ubwo Kayumba akomeje icengezamatwara ryo kugereka ibura rya Ben Rutabana kuri Gervais Condo kugirango arebe ko yakongera kugarurirwa ikizere n’abayoboke ngo birazwi neza ko Ben Rutabana ubwe yasize avuze abantu bafitanye ikibazo muri RNC kwisonga Kayumba Nyamwasa.
N’ubwo Gervais Condo nawe yashyizwe mu majwi, ngo ntibyumvikana ukuntu umusaza nka Gervais Condo utazi ibya gisirikare yishuzwa Rutabana w’umusirikare n’abantu b’abasirikare nka Kayumba Nyamwasa na Jean Paul Turayishimiye mu gihe uyu we azi neza ko ibisobanuro Gervais Condo yatanze ku ibura rya Ben Rutabana yabivuze abitumwe na Kayumba Nyamwasa ndetse yanijejwe abeshywa ko Rutabana ari amahoro bavugana nawe buri munsi ko ibyo abantu barikuvuga ko yaburiwe irengero ari amabwire y’abashaka gusenya RNC.
Ese Gervais Condo arazira iki?
Amakuru yo kwizerwa agera kuri Rwandatribune ni uko muri RNC haba hari akanama gashinzwe kwirukanisha Gervais Condo ku mwanya w’umunyamabanga mukuru wa RNC cyangwa se akirukanwa no muri uwo mutwe burundu biturutse ku kuntu mu minsi ishize yifatanyije n’abahezanguni baharanira kwemeza ko habayeho jenoside yakorewe Abahutu bagamije gupfobya iyakorewe Abatutsi mugihe ngo muri RNC ibyo batabyemera.
Ikindi ngo n’uburyo Gervais Condo arimo agambanirwa na bamwe mu banyamuryango bagize ako kanama bavuga ko hari amabanga y’umutungo wa RNC bakeneye ko abamenera bitenewe n’uko ngo batajya bamenya uko uyu mutongo ukoreshwa n’ibyo ukora ariko ngo we akomeza kubabera ibamba .
Ikibazo cy’ibura rya Ben Rutabana cyasenye bikomeye umumwe bw’abanyamuryango bimena ba RNC ndetse kikaba gikomeje gushyira hanze imikorere y’ubutiriganya by’umukuru waryo Kayumba Nyamwasa wihishe inyuma y’abanyapolitiki bafitanye isano n’ingoma ya Habyarimana mu rwego rwo kwishakira amaronko mu Banyarwanda n’abanyamahanga bakorana n’imitwe igamije guhungabanya umutekano w’u Rwanda.
Hategekimana Claude
