Ikigo Google Inc cyateye utwatsi ubusabe bwa Guverinoma ya Uganda , yayandikiye iyisaba gufunga imiyoboro ya Youtube ifite aho ihuriye n’imyigaragambyo yakurikiye itabwa muri yombi rya Bobi wine mu kwezi gushize.
Umuyobozi muri Google Inc ushinzwe itumanaho mu ishami rya Afurika ,Dorothy Ooko mu ibaruwa yanditse kuri uyu wa Gatatu tariki ya 15 Ukuboza 2020 isubiza iya Guverinoma ya Uganda yo kuwa 9 Ukuboza, yavuze ko Google izashyira mu bikorwa ubusabe bwabo ari uko babanje kuzana icyemezo cy’urukiko rwemeza ko ibyo bashinja iyi miyoboro 14 ikorera kuri Youtube icungwa na Google Inc ari ukuri.
Yagize ati” Byagorana kuvuga ko icyifuzo cya Guverinoma ya Uganda cyo gufunga imiyoboro 14 yose kizashyirwa mu bikorwa . Ubusanzwe dukorera ku mategeko y’imbere mu bihugu gusa kuriiyi nshuro bisaba ko Guverinoma ya Uganda ko yerekana icyangombwa cy’urukiko cyemeza ko ibishinjwa iyo miyoboro ari ukuri”
Kuwa 9 Ukuboza 2020 nibwo Guverinoma ya Uganda ibinyujije muri Komisiyo yayo ishinzwe itangazamakuri n’Itumanaho, yandikiye Google iyisaba guhagarika imiyoboro(Channel) ya Youtube 14 ishinjwa na Leta gutera ingabo mu bitugu imyigaragambyo yo mu Ugushyingo 2020 yahitanye abarenga 50 . Ni imyigaragambyo yakurikiye itanbwa muri yombi ry’umukandida Perezida w’ishyaka NUP, Robert Ssentamu Kyagulanyi uzwi nka Bobi Wine wafunzwe azira kurenga ku mabwiriza yo kurwanya Covid 19.
Imiyoboro yasabiwe gufungwa ni TMO online, Lumbuye Fred, Trending Channel Ug, Uganda Yaffe, Uganda News Updates, Ghetto TV, Busesa Media Updates ,Uganda Empya,Map Mediya TV, KK TV, Ekyooto TV, Namungo Media, JB Muwonge 2 na Bobi Wine 2021.
