Polisi ya Uganda yataye muri yombi uwitwa Luta Ferdinand na mugenzi we Nsereko Ashraf bagaragaye mu mihanda y’umurwa mukuru Kampala bakuruta ikibumbano cyambitswe nka Museveni mu mujyi rwagati.
Aba bagabo bombi batawe muri yombi kuwa Mbere tariki ya 15 Gashyantare 2021. Mu kwiregura kwabo bemeje ko ari impirimbanyi zishaka impinduka mu mitegekere ya Uganda hagamijwe guhindura mibereho y’abatuye iki gihugu.
Bavuze ko Museveni yagaragaje uburiganya mu matora y’umukuru w’igihugu yabaye ku wa 14 Mutarama 2021.
Umuvugizi wa Polisi muri Kampala yabwiye Daily Monitor ko aba bagabo batawe muri yombi, kuri ubu bakaba bari gukorerwa dosiye kugira ngo bashyikirizwe ubutabera.
Kuva Museveni yatorerwa kongera kuyobora Uganda bamwe mu baturage b’iki gihugu biganjemo urubyiruko bakomeje kugaragaza ko batabyishimiye cyane ko abenshi muri bo bari bashyigikiye Robert Kyagulanyi uzwi nka Bobi Wine na we ukomeje kuburana agaragaza ko yibwe mu matora.
Ibi byabaye kandi nyuma yaho abunganira Kyagulanyi mu rubanza aburanamo n’Ishyaka NRM riri ku butegetsi bangiwe gutanga bimwe mu bimenyetso bavuga ko ari simusiga bigaragaza ko Museveni yariganyije amatora yo kuwa 14 Mutarama 2021.
