Abanyekongo bashigikiye ubutegetsi bwa Perezida Felix Tshisekedi ,bakomeje kugaragaza ko badashigikiye igitekerezo icyari cyo cyose cyatuma ubutegetsi bwemera kugirana ibiganiro n’umutwe wa M23 .
Ejo kuwa 23 ugushyingo 2022, Juvenal Munubo umudepite mu nteko ishinga amategeko ya DRC ukomoka mu gace ka Walikale akaba n’umwe mu bagize komisiyo ishinzwe ubusugire bw’igihugu n’umutekano muri iyo nteko , yabwiye itangazamakuru ko kugirana ibiganiro n’umutwe wa 23 ari ibintu bigomba kwitonderwa.
Akomeza avuga ko mu gihe ubutegetsi bwa DRC bwakwemera ibiganiro , byatuma umutwe wa M23 usaba ko uhabwa imyanya muri Guverinoma no gusaba ko abarwanyi bawo bashyirwa mu ngabo z’igihgu , nk’uko byagenze ku gihe cya RCD( ressemblement Congolais pour la Democratie).
Depite Munumo, avuga ko gushyira M23 mu ngabo z’igihugu ryaba ari ikosa rikomeye ry’amateka ryaba rikozwe n’ubutegetsi bwa DRC.
Yagize ati:” Kwemera ibiganiro n’umutwe wa M23 byatuma usaba ko wahabwa imyanya ikomeye muri Guverinoma no gusaba ko abarwanyi bawo bashyirwa mu ngabo z’igihugu FARDC nk’uko byagenze mu bihe bya RCD.
Ryaba ari ikosa ry’amateka kandi rikomeye twemeye ko abarwanyi ba M23 bavangwa n’ingabo zacu.”
Akomeza avuga ko kwemera ko abarwanyi ba M23 bavangwa na FARDC nta musaruro byatanga ,ngo kuko no mu bihe byashize igikorwa cyo kuvanga inyeshyamba zahoze ari iza RCD( Ressemblement Congolais pour la Democratie) n’ingabo za FARDC nk’uko byari byemejwe mu biganiro bya Sun City mu 2003 ariko nti byatanga umusaruro ngo kuko n’ubundi haje kuvuka undi mutwe ariwo CNDP yaba Laurent Nkunda nyuma haza M23 kandi ngo iyi mitwe yose yashinzwe n’abahoze muri RCD yaba Azalias Ruberwa .
yongeyeho ko kwaba ari nko guha umwanzi w’umuturanyi icyuho cyo kumufasha gucengera igisirikare cy’igihugu FARDC ngo kuko M23 ari umutwe ugizwe n’abanyamahanga bakomoka mu Rwanda na Uganda ngo bakaba batakwemera ko abanyamahanga bacengera igisirkare cyabo FARDC.
HATEGEKIMANA Claude
Rwandatribune.com
Iyi ntambara izamara igihe kirekire kuruta uko abantu babitekereza. Iki kibazo nikidakemuka muburyo bwa diplomasi gishobora kuzamara imyaka iruta iyo alshabab imaze muri Somalia kdi yo inarwana intambaza z’ububwa nkanswe M23 irwanira ibintu byumvikana.