Benshi mu badepite bo muri Repubulika Iharanira Demokarasi ya Congo bakomeje kwanga no kwamaganira kure guverinoma nshya iherutse gushyirwaho na Minisitiri w’Intebe, Judith Suminwa Tuluka.
Nyuma yo kugirwa Minisitiri w’intebe na Perezida, Madame Judith Suminwa Tuluka afatanije na Perezida Félix Tshisekedi Tshilombo yatangaje abagize Guverinoma nshya muri Repubulika ya demokarasi ya Congo ku wa 29 Gicurasi .
Abagize iyi leta bangana na 54 bari mu bice bigera kuri bitanu harimo aba minisitiri b’intebe b’ungirije, ba minisitiri ba leta, minisitiri, intumwa(minisitiri delegués) na ba visi Minisitiri.
Iyi guveroinoma nshya yagaragayemo impinduka ugereranyije n’iyari isanzweho, kuko hahinduwe abarimo Minisitiri w’Ingabo, Minisitiri w’Ububanyi n’Amahanga, Minisitiri w’Umutekano w’Imbere, Minisitiri w’Ubukungu, Minisitiri w’Imari na Minisitiri w’Ubutabera.
Nkuko tubikesha Rdio Okapi aba badepite bavuze ko ubwo Suminwa yashyiragaho abagize iyi guverinoma, yarenze ku biteganya n’ingingo ya 90 y’Itegeko Nshinga rya RDC kuko hari ibice by’igihugu yabogamiyemo cyane, mu gihe nka Maniema nta n’umwe ifite uyihagarariye.
Bongeyeho ko iyi guverinoma idashingiye ku bwumvikane bw’imitwe ya politiki, aho buri wose wagombaga guhagararirwa.
Ikibazo gikomeye bagaragaje kiri muri iyi guverinoma ni uko hari imitwe ya politiki ifite ubwiganze mu mutwe w’abadepite yabuze umwanya byibuze umwe muri guverinoma.
Aba badepite bakaba basabye Leta ya Congo ko hasubikwa igikorwa cyo kurahiza abagize guverinoma nshya giteganyijwe tariki ya 15 Kamena 2024, hagasubirwamo amatora mu buryo butabogamye
NIYOGISUBIZO Cynthia
Rwandatribune.com
