Hagaragaye amashusho ababaje y’uwo mu nzego z’umutekano muri Congo yakandagiye umutwe w’umukobwa

Hakomeje gucicikana amashusho ababaje y’uwo bivugwa ko ari mu nzego z’umutekano muri Repubulika Iharanira Demokarasi ya Congo, ari gukandagira agasyonyora umukobwa bamwambitse ubusa.

Ni amashusho yashyizwe ku mbuga nkoranyambaga, kuri uyu wa Kabiri tariki 14 Gashyantare 2023, agaragaza ubugome ndengakamere.

Muri aya mashusho, haba hari umukobwa waryamishijwe hasi n’abagabo bikekwa ko ari abo mu nzego z’umutekano muri RDCongo.

Muri abo bagabo baba bari kuvuga ururimi rw’ilingala, hagaragaramo umwe yakandagiye umutwe w’umukobwa agatsindagira akageza aho agahagarara akaguru kamwe atsindagira.

Umwe mu bashyize ku mbuga nkoranyambaga aya mashusho, yagaragaje ko ubutegetsi bwa Repubulika Iharanira Demokarasi ya Congo bukomeje guhonyora uburenganzira bwa muntu.

Byumwihariko yavuze ko bibabaje gufata umugore nk’uyu bakamwambika ubusa bakamukorera igikorwa cy’iyicarubozo nk’iki, asaba ko inzego zishinzwe kurengera abagore, guhaguruka zikabirwanya.

RWANDATRIBUNE.COM