Umuryango uharanira uburenganzira bwa muntu, Human Rights Watch (HRW), watangaje raporo ivuga ko leta zigera kuri 83 ku isi zakandamije ubwisanzure bwo kuvuga, guterana mu mahoro n’ubundi burenganzira, zitwaje icyorezo cya Covid-19.
HRW ivuga ko mu bihugu bimwe na bimwe habaye kwica abantu, gufunga binyuranyije n’amategeko, gufunga abanyamakuru, kubangamira abatavuga rumwe na leta n’ibindi, mu izina rya Covid-19.
Ku Rwanda ,iyi raporo yagarutse ku gufungira abantu muri za stade mu buryo bunyuranyije n’amategeko ,gufunga abanyamakuru ndetse n’izindi ngamba zikakaye zafashwe nka guma mu rugo n’izindi nk’uburyo bubangamira uburenganzira bwa muntu.
Gerry Simpson ukuriye ishami rireba amakimbirane n’intambara muri HRW, avuga ko “gukubita, gufunga, gushyira ku nkeke no gucecekesha abantu bibangamiye uburenganzira bw’ibanze”.
Yagize ati: “Leta zikwiye kurwanya Covid-19 zishishikariza abantu agapfukamunwa aho kubapfuka umunwa”.
Mu kiganiro n’abanyamakuru kuri iyi raporo, Gerry Simpson yavuze ko leta nyinshi zakoze ibikorwa nk’ibyo ku bantu barimo n’abanyamakuru, abatavuga rumwe na leta n’impirimbanyi z’uburenganzira mu izina ryo “kutubahiriza amabwiriza yo kwirinda cyangwa kunenga politiki za leta kuri iki cyorezo.”
Ati: “Mu gihugu nka Misiri ho, n’abakora mu nzego z’ubuzima bahohotewe na leta kubera ko hari ibyo batemera muri politiki za leta zo kurwanya iki cyorezo.”
Muri iyi raporo, HRW ivuga ko leta z’ibihugu birimo; Kenya, Africa y’Epfo, Tanzania, Ubuhinde, Ubushinwa, Ukraine n’ibindi…yabonye ibikorwa binyuranye bihutaza uburenganzira bwa muntu byitwaje iki cyorezo.
