Kuri uyu wa Gatandatu nibwo rutahizamu ukomoka mari Cameroon Samuel Eto’o yatangaje ko ahagaritse gukina umupira w’amaguru nk’uwabigize umwuga nyuma yo kuba yarabaye umunyabigwi by’ikirenga atsinda ibitego akanatwara ibikombe mu makipe atandukanye no mu ikipe y’igihugu cye.
Mu gihe cy’imyaka 22 rutahizamu Eto’o asezeye ku mupira w’amaguru afite ibikombe 15 mu makipe 14 atandukanye yanyuzemo n’ibikombe 2 yahesheje ikipe y’igihugu cye kongeraho umudali wa Zahabu mu mikino Olympic.
Uyu muhungu w’umubaruramari ukomeye muri Cameroon yakijijwe no guconga ruhago abarirwa umutungo uri hagati ya miliyoni 90 z’amadorali y’amerika akaba afite n’amazu 2 y’imiturirwa mu mugi wa Milan mu gihugu cy’ubutaliyani no muri USA
Muri rusange, Eto’o yatwaye ibikombe bitatu bya Shampiyona ya Espagne (La Liga), UEFA Champions League ebyiri, Copa del Rey na Super Cup za Espagne ebyiri.
Guhirwa no kwitwara neza byakomereje mu Butaliyani, atwara Shampiyona ya Seria A n’igikombe cya UEFA Champions League, igikombe cy’Isi cy’amakipe na Coppa Italia inshuro ebyiri. Ikipe y’igihugu cye, Eto’o yayihesheje igikombe cy’Afurika inshuro 2 zikurikiranya mu mwaka wa 2000 ndetse na 2002.
Eto’o Fils ni rutazuyaza mu kunyeganyeza incundura dore ko mu mateka ye yose yatsinze ibitego 370 mu mikino 759.
Kwandika aya mateka byahereye mu ikipe ya Leganes FC yo muri Espagne yarimo nk’intizanyo ya Real Mardid mu gihe cy’umwaka umwe maze abatsindira ibitego 4.
Ikipe yamurabutswe ari nayo yatwariyemo igikombe cye cya mbere ni Mallorca yamazemo imyaka 4 (2001-2004) ayitsindira ibitego 70 mu mikino 165.
Urugendo rwakomereje mu ikipe ya FC Barcelona yamazemo imyaka 5 (2004-2009), ayitsindira ibitego 130 mu mikino 199 aho yavuye yerekeza muri Intel de Milan (2009-2012) akina imikino 102 atsinda ibitego 53.
Anzhi Makhachkala yabayemo imyaka 2 (2012-2014) yakiniye imikino 73 atsindamo ibitego 36, Chelsea yayikiniye imikino 35 atsinda ibitego 12.
Everton yayikiniye imikino 20 atsinda ibitego 4, Samporia yayikiniye imikino 18 ayitsindira ibitego 2. Muri 2015, yerekeje muri Turquie, akinira Antalyaspor, aho yayitsindiye ibitego 44 mu mikino 76 mbere yo kwerekeza muri Konyaspor yastindiye ibitego 6 akayivamo ajya muri Qatar SC yastindiye ibitego 9.
Mu tundi duhigo uyu mugabo yihariye harimo kuba asezeye ari we mukinnyi watsindiye Cameroun ibitego 56 mu nshuro 118 yahamagawe , akaba umukinnyi watsinze ibitego byinshi mu mateka y’igikombe cya Afurika (18) ndetse yabaye Umukinnyi w’Umwaka muri Afurika inshuro enye.
Christian Hakorimana
