Ibitaro bya MBC biherereye mu Karere ka Nyarugenge byaherukaga gufungwa na Minisiteri y’Ubuzima, byongeye gukomorerwa nyuma y’ubugenzuzi bwakozwe ku mikorere yabyo, bisabwa kwirinda kongera kugwa mu makosa nk’aya mbere.
Ubwo ibi bitaro byafungwaga, Umuyobozi Mukuru w’Ishami ry’Ubuvuzi muri Minisiteri y’Ubuzima, Dr Corneille Ntihabose, yari yabwiye IGIHE ko gufungwa byaturutse kuri raporo yakozwe ikagaragaza ko hari amakosa akomeye yabayeho atatuma bikomeza gukora.
Ibi bitaro byari byafunzwe ku wa 3 Ukwakira 2021 nyuma y’igenzura ryatangiye muri Nzeri uyu mwaka, aho ibitaro 47 ari byo byari bimaze kugenzurwa.
Ibaruwa yandikiwe ibi bitaro kuri uyu wa 28 Ukwakira 2021 igira iti “Minisiteri y’Ubuzima irashima imbaraga mwashyizemo mu kuziba ibyuho byari byagaragajwe mu igenzura, birimo kuvugurura no gusana ibikorwaremezo. Ku bw’ibyo, Minisiteri yishimiye kubamenyesha ko ivuriro ryanyu ryemerewe kongera gukora, rigahabwa n’icyangombwa gishya cy’ivuriro ryigenga, kandi mukomeze gukemura bimwe mu bitaragenda neza.”
Bimwe mu byo Minisiteri yasabye ubuyobozi bw’ibi bitaro harimo kwihutisha gusana no kuvugurura ibikorwaremezo, ikoreshwa ry’ikinya rigakorwa hashingiwe ku mabwiriza asanzwe ya Minisante, fagitire y’imiti yakoreshejwe cyangwa ibyahawe umurwayi bikwiye kuba bishingiye ku bimenyetso bigaragara ndetse no kubagwa bikwiriye gukorwa mu buryo bubika ibimenyetso. Minisiteri yasabye kandi ko ibi bitaro bizatangira imirimo ari uko bifite imbangukiragutabara yabyo kandi yujuje ibisabwa byose, gutanga akazi bikurikije amabwiriza agenga umurimo n’ibindi bigamije kubungabunga umutekano w’umurwayi n’imibereho myiza y’abakozi.
Minisante yihanangirije ibi bitaro ko mu gihe haramuka hagaragaraye ukwisubiramo ku makosa yagiye akorwa byakuriraho gufungwa burundu kandi imenyesha ko nyuma y’amezi atatu hazakorwa irindi genzura rigamije kurebera hamwe ko ibyasabwe biri kubahirizwa.
Ibitaro bya MBC Hospital byatangiye gutanga serivisi z’ubuvuzi ku wa 16 Mutarama 2018 bitangirana serivisi zirimo kwakira abarwayi b’indembe, ubuvuzi bw’abana, ubw’indwara zo mu mubiri, ubuvuzi bw’indwara z’ababyeyi n’abakeneye kubagwa.
Byanakiraga abafite indwara zo mu kanwa n’amenyo, abakeneye kugororwa ingingo, gupima ibizamini, gucisha abarwayi mu cyuma, kwakira abarwayi bashyirwa mu bitaro, gusuzuma mu gifu, indwara z’amara n’izindi. MBC Hospital ifite ubushobozi bwo kwakira abarwayi bayigana bivuza bataha, ibyumba byo kubagiramo birenga bine n’ibitanda bisaga 70 byo kwakiriraho abivuza badataha.
Uwineza Adeline
