Ibyamamare mu ngeri zinyuranye byahagurukiye kwamagana ibikorwa by’ihohoterwa bikorwa n’umuhanzi w’ikirangirire muri Uganda Weseal ukubita umugore we Umunyarwandazi Teta Sandra, basaba ko agomba kubiryozwa.
Mu bukangurambaga bwiswe #Endviolance #Weasel buri gukorwa ku mbuga nkoranyambaga, ibyamamare byaba ibyo mu Rwanda no muri Uganda, bakomeje gusaba ko Weasel agezwa imbere y’ubutabera akabazwa ihohoterwa yakoreye umugore we.
Ibi bibaye nyuma yuko hagaragaye amafoto ya Teta Sandra agaragara afite ibikomere umubiri wose bivugwa ko yakubiswe n’umugabo we Weasel.
Mutesi Jolly wabaye Miss Rwanda 2016, ari mu binjiye muri ubu bukangurambaga aho yavuze ko Weasel adakwiye kwihanganirwa kubera ibyo yakoreye umugore we.
Yagize ati “Iyo ihohoterwa rikorerwa abagore ridahaniwe, biba ibintu bisanzwe. Ibi ni byo biri kuba kuri Teta Sandra. Ubu bugome ntibukwiye kwihanganirwa. Ntabwo ihohoterwa rikorerwa mu rugo rikwiye kuba ikintu cyo guhishira.”
Umunyamakuru Sheila Gashumba ufite izina rikomeye muri Uganda, na we yavuze ko ibi biri gukorerwa Tata Sandra bidakwiye guhita ngo bigende hatabayeho ubutabera.
Yagize ati “Tugomba guhaguruka tukamagana ibi bintu ndetse tukabirwanya twivuye inyuma tutitaye ku masani cyangwa ubucuti.”
Uwitwa Ernesto Ugeziwe wigeze kuba Umunyamakuru kuri RBA, we yanditse asaba umuhanzi Chameleone kugira icyo akora kuri iri hohoterwa riri gukorwa n’umuvandimwe we Weasel.
Yagize ati “Nshuti Chameleone umuvandimwe wawe Weasel arashinjwa ihohoterwa rikorerwa mu rugo ari gukorera umuvandimwe wacu. Turagusaba kugira icyo ukora kandi ukareka gukomeza guceceka kuri iki kibi.”
RWANDATRIBUNE.COM
