Umunyamakuru Jimmy Shukrani Bakomera, wa Radiyo Ijwi ry’Amerika n’ibindi bitangazamakuru bikorera muri Congo, nyuma yo gutabwa muri yombi n’inzego z’iperereza muri Congo ,ashinjwa gukorana n’umutwe wa M23 yafunguwe.
Ku mugoroba wo ku wa 17 Gashyantare 2023 nibwo urwego rushinzwe iperereza rwa Congo rwafunguye uyu munyamakuru nyuma y’igihe ahatwa ibibazo aho yarafungiwe muri Kasho i Goma.
Akigera hanze yashimiye abamutabarije bose barimo umunyamategeko Ngabo Sosthene ndetse n’umunyepolitiki Hon Sebishimbo.
Yagize ati “Ubu dufite umudendezo, murakoze mwese kubw’amasengesho n’ubutabazi.”
Yashimiye ibitangazamakuru birimo Radiyo Ijwi rya Amerika Ishami ry’Ikirundi n’Ikinyarwanda asanzwe akorera, Kivu Morning Post yandikira ndetse n’imiryango irengera abanyamakuru irimo JED.
Umunyamakuru Jimmy Shukrani Bakomera, yatawe muri yombi mu gace ka karuba muri teritwari ya Masisi tariki 16 Gashyantare 2023 ,nyuma yo gukekwaho gukorana bya hafi na M23.
Ubwo yari akimara gutabwa muri yombi , uyu munyamakuru yahise yoherezwa muri kasho yo mu mujyi wa Goma.
Umwe mu banyamakuru bakorera muri uyu mujyi utashatse ko dushyira hanze amazina ye ku mpamvu z’uutekano we ,yabwiye Rwandatribune ko ibyaha bishinjwa mugenzi wabo ari ibinyoma bishingiye ku makuru y’ibihuha.
Avuga ko ku munsi wejo ,Jimmy Shukrani yagiye i Karuba gutara inkuru ijyanye n’iyandikwa ry’abazitabira amatora muri Repubulika ya Demokarasi ya Congo, hanyuma agahita atabwa muri yombi n’inzego zishinzwe iperereza ANR ndetse ko ashobora kujyanwa I Kinshasa abeshyerwa gukorana na M23.
Ku mbuga nkoranyambaga, abanyamakuru bakorera mu mujyi wa Goma bakomeje kwamagana ifungwa rya mugenzi wabo, bavuga ko bigamije gucecekesha itangazamakuru ku mugaragaro.
Aba banyamkuru bongeraho ko kuva intambara yakwaduka hagati ya Leta n’umutwe wa M23 ,abanyamakuru bahohoterwa n’uruhande rwa Leta abandi bagafungwa bazira amaherere.
Bongera ho ko ,umunyamakuru uhirahiye akavuga ibyo igisirikare kidashaka ahimbirwa gukorana na M23 akisanga muri gereza.
