Ku mbuga nkoranyambaga haba kuri status za WhatsApp, kuri Facebook no kuri Twitter, ntakindi kiri kugarukwaho uretse ifoto ya Sadio Mane ari kumwe na Kwizera Olivier ari kumwongorera amagambo.
Ni ifoto yafashwe nyuma y’umukino wahuze u Rwanda na Senegal wo gushaka itike yerekeza mu gikombe cya Afurika wabaye mu ijoro ryo kuri uyu wa Kabiri tariki 07 Kamena 2022.
Uyu mukino wabonetsemo igitego kimwe cya Senegal cyatsinzwe na Sadio Mane, wababaje Abanyarwanda batari bacye bari bizeye ko Ikipe yabo igiye kunganya na Senegal ariko ikaza kuyibonamo igitego mu minota y’inyongera kuri Penaliti.
Uyu mukino urangiye, Rutahizamu wa Senegal, Sadio Mane usanzwe azwi muri Liverpool yo mu Bwongereza, yegereye umunyezamu w’u Rwanda, Kwizera Olivier aramuramutsa ubundi amwongorera amagambo ataramenyekana.
Benshi bari kugaruka ku ifoto igaragaza Sadio Mane ari kumwe na Kwizera Olivier, baribaza icyo yaba yamubwiye, mu gihe hari n’abemeza ko yamushimiraga uburyo yitwaye kuko yakinnye neza.
Kwizera Olivier usanzwe akina muri Rayon Sports, ni umwe mu bakinnyi bakoze akazi gakomeye muri uyu mukino w’u Rwanda na Senegal dore ko na penaliti yatewe na Sadio Mane yagerageje kuyikuramo ariko bikanga, gusa yakoze ku mupira ariko igitego kijyamo.
RWANDATRIBUNE.COM
