Ifoto y’umunsi: Bamwe ngo aratwite! Gen Cirumwami yagizwe igitaramo nyuma yo gusimbuka igico cya M23

Gen Maj Cirumwami Peter, Komanda wa Operasiyo Socola 2 ikorera muri Kivu y’Amajyaruguru yagizwe igitaramo nyuma yo kugaragara yashobewe n’urugamba rwo  kuri iki Cyumweru tariki ya 12 Kamena 2022.

Kuri uyu wa 12 Kamena 2022 nibwo FARDC yiriwe mu mirwano ikomeye iyihanganishijemo n’abarwanyi ba M23 muri Lokarite ya Bunagana. Ni imirwano itororoheye FARDC, dore ko M23 kuri uwo munsi yamaze amasaha arenga atanu igenzura uduce twinshi tw’umujyi wa Bunagana mbere y’uko iwufata wose mu gitondo cyo kuri uyu wa 13 Kamena 2022.

Gen Maj Cirumwami uyoboye ingabo za FARDC mu rugamba yafashwe ifoto bisa naho yashobewe, ari nabyo byatumye abenshi mu bakoresha imbuga nkoranyambaga bamugira igitaramo.

Muri aba hari uwitwa Muhindo, wavuze ko impamvu FARDC itsindwa na M23 ari uko bananiwe, ndetse ngo iyo ubarebye ubona ko badakora imyitozo isanzwe ikorwa n’abasirikare.

Yagize ati” Ukabona umuntu nta mbaraga afite, wagira ngo aratwite, warangiza ukamwita ngo Gen, ngo Col. FARDC ntacyo izageraho”

Umunsi wo ku Cyumweru wabaye mubi by’umwihariko ku ruhande rwa Gen Cirumwami, dore ko ubwo yari munzira ataha avuye ku rugamba, yategezwe igico mu gace ka Premidis gahuza Rutshuru na Bunagana.

Iki gico n’ubwo yagisimbutse, Majoro Eric Mwasi wari ukuriye abamurinda yahitanwe nacyo.

Imirwano ikomeye yabereye mu gace ka Bigega 1 , Bigega ya 2 na  Premidis mu nkengero z’umujyi wa Bunagana.