Ikirwa cya Tonga kiri mu Nyanja ya Pacific cyatangaje ko kuwa Kane tariki 28 Ukwakira 2021 cyabonye umurwayi wa mbere ugaragaweho icyorezo Covid-19 kuva cyaduka ku Isi mu mwaka 2019.
Ubwo bwandu bwabonetse mu muntu wakingiwe byuzuye, wari ugeze mu gihugu aje mu ndege ivuye muri New Zealand.
Minisitiri w’Intebe wa Tonga Pohiva Tu’i’onetoa yaburiye abatuye ku kirwa kinini cya Tongatapu ko bari mu byago byuko mu cyumweru gitaha bashobora gushyirwa muri gahunda ya guma mu rugo.
Igihugu cya Tonga cyari kimwe mu bihugu bya nyuma byari bisigaye bitaratangazwamo ubwandu bwa Covid 19.Abantu barenga 100,000 batuye muri icyo kirwa, kiri mu majyaruguru ashyira uburengerazuba bwa New Zealand.
Abangana na kimwe cya gatatu (abagera ku 33,000) cy’abaturage bose ba Tonga ni bo bakingiwe byuzuye.
Minisiteri y’ubuzima ya New Zealand yavuze ko uwo muntu nta coronavirus bari bamusanzemo mbere yuko ava muri icyo gihugu.
Ariko abategetsi bo muri Tonga bavuze ko bayimusanzemo ku wa kane nyuma y’ipimwa risanzwe, rikorwa iyo umuntu ari mu kato gategetswe muri icyo gihugu.
Kuva iki cyorezo cyatangira, ku isi hamaze gutangazwa abantu barenga miliyoni 246 banduye coronavirus, n’abagera hafi kuri miliyoni 5 bapfuye bivuye kuri Covid, nkuko bigaragazwa n’imibare ya Kaminuza ya Johns Hopkins yo muri Amerika.
Ibihugu bisigaye bitaratangaza umurwayi n’umwe wanduye Covid1-9 brimo Tuvalu, Koreya ya Ruguru na Turkmenistan.
