Mugabekazi Liliane wagaragaye mu gitaramo cyabaye mu minsi ishize mu Mujyi wa Kigali, yagejewe imbere y’urukiko rw’ibanze rwa Kicukiro kubera icyaha cyo gukora ibiteasoni mu ruhame akurikiranyweho.
Yagejewe imbere y’urukiko kuri uyu wa Kane tariki 18 Kanama 2022 aho Ubushinjacyaha bwamugejeje imbere y’Urukiko bumusabira gufungwa by’agateganyo iminsi 30.
Uyu mukobwa umaze icyumweru atawe muri yombi akaba afungiye i Remera mu Mujyi wa Kigali, akurikiranyweho icyaha cyo gukora ibiterasoni mu ruhame yakoze kubera imyambarire ye yagaragazaga imyanya ye y’ibanga.
Iyi myambarire yayambaye ubwo yitabiraga igitaramo cyaririmbyemo umuhanzi mpuzamahanga uzwi nka Tacy cyabaye tariki 30 Nyakanga 2022.
Ubushinjacyaha bwagaragarije urukiko impamvu zikomeye bushingiraho bumusabira gufungwa by’agateganyo aho bwavuze ko aramutse arekuwe byatuma n’abandi bakobwa bakomeza kwambara imyambarire ye bakaba bakwisanga bari gukora iki cyaha kiregwa mugenzi wabo.
Urukiko rw’Ibanze rwa Kicukiro rwasoje uru rubanza rw’ifunga n’ifungurwa, rutegeka ko ruzasoma icyemezo cyarwo mu cyumweru gitaha tariki 23 Kanama 2022.
RWANDATRIBUNE.COM
