Nyuma y’aho ingabo za Congo zitangaje ko hari uduce yamaze kwisubiza twari twarafashwe na M23, umuvugizi w’ishami rya gisirikare ry’umutwe wa M23, Lt Col Willy Ngoma, yanyomoje ayo makuru.
Icya mbere Lt Col Ngoma yanyomoje ni amakuru amaze iminsi avuga ko ingabo za Congo FARDC n’abo bafatanya baba baherutse kwambura M23 agace ka Shasha bari bafashe ko muri Teritwari ya Masisi.
Ni agace kari ku muhanda uhuza imijyi ya Goma, Sake na Bukavu M23, yafunze mu mpera z’icyumweru gishize bituma imihanda hafi ya yose yinjira muri Goma isa n’ifunze.
Usibye Shasha, Minisitiri w’Itumanaho wa RDC akanaba Umuvugizi wa Guverinoma y’iki gihugu, Patrick Muyaya, yaraye yabwiye itangazamakuru ko Ingabo za Leta zisubije agace ka Kirotshe kari muri twinshi inyeshyamba zigaruriye ku wa Mbere w’iki cyumweru.
Ni amakuru cyakora yanyomojwe na Lt Col Willy Ngoma wabwiye BWIZA ko “bitandukanye n’ibiri kuzenguruka kuri murandasi, iri huriro nta na santimetero n’imwe y’uduce twabohowe na M23 ryigeze ryisubiza”.
Lt Col Willy Ngoma yavuze ko kuri ubu impande zombi ziramukiye mu mirwano iri kubera mu gace ka Nturo, nyuma y’uko ihuriro ry’ingabo za Leta riteye ibirindiro bya M23 bigaherereyemo.
