Ingabo z’u Rwanda n’iza Mozambique zatangaje ko zifatanyije bafashe umujyi wo ku cyambu wa Mocímboa da Praia mu majyaruguru ashyira uburasirazuba bwa Mozambique.
Hari hashize imyaka irenga ibiri inyeshyamba zarigaruriye uyu mujyi – ari nawo urimo icyicaro gikuru cy’akarere ka Mocímboa da Praia mu ntara ya Cabo Delgado.
Umuvugizi w’ingabo za Mozambique Colonel Omar Saranga yabwiye abanyamakuru i Maputo ko uyu mujyi uri mu maboko ya leta kuva saa tanu z’amanywa kuri iki cyumweru.
Col Saranga yavuze ko igitero cy’ingabo za Mozambique n’iz’u Rwanda ari cyo cyafashe uyu mujyi, nk’uko umunyamakuru Jose Tembe wa BBC muri Mozambique abivuga.
Col Saranga yavuze ko bari kugenzura ko abarwanyi bahunze batagenda bakagira ahandi bisuganyiriza.
Ifatwa rya Mocímboa da Praia rishobora kuza kugarukwaho mu ijoro ryo kuri iki cyumweru na Perezida Filipe Nyusi uri mu ruzinduko muri Cabo Delgado.
Aha muri Mocímboa da Praia mu 2017, niho itsinda rito ry’insoresore ryatangirije imigumuko zifata intwaro n’ibigo bya gisirikare, intambara igenda ikwira henshi muri iyi ntara.
Mu gihe kigera ku kwezi ingabo za Mozambique zitangiye gufashwa n’iz’u Rwanda, zisubije ibice byinshi byari byarafashwe n’izi nyeshyamba, bivugwa ko zikorana n’umutwe wa Islamic State (IS).
Abasesenguzi mu bya gisirikare bavuga ko kuva haje ingabo nyinshi z’amahanga izi nyeshyamba ziri kugenda zita ibirindiro byazo, zikibumbira mu matsinda mato aho bikekwa ko zishaka kurwana intambara ya Guerrilla.
Mu mpera z’iki cyumweru, u Rwanda rwohereje abandi basirikare n’abapolisi abbarirwa mu magana muri Cabo Delgado.
Mocimboa da Praia
Ingabo z’umuryango w’ibihugu bya Africa y’amajyepfo (SADC) nazo muri iki cyumweru dushoje zaje gufasha iza Mozambique.
Intambara imaze imyaka ine mu ntara ya Cabo Delgado yatumye abarenga 3,000 bicwa naho abagera ku 800,000 bava mu byabo.
