Leta Zunze Ubumwe z’Amerika zikomeje kuvuga ko ingabo za Sudani ndetse n’umutwe w’inyeshyamba wa RSF bakomeje guhangana, bari kwica abaturage.
Antony Blinken umunyamabanga wa Leta zunze ubumwe z’Amerika , yemeje ko abagize ingabo za Sudani ndetse n’iz’umutwe witwara gisirikare RSF bakoze ibyaha byibasiye inyokomuntu, no guhembera ubushyamirane bushingiye ku moko muri Sudani.
Ibiro ntaramakuru by’Abongereza Reuters yanditse ko amaraso yamenetse, urugomo ruriyongera ndetse benshi bavanwa mu byabo, mu mirwano hagati y’ingabo za Sudani na RSF yatangiye muri Mata, yatumye intambara igera no mu baturage.
Mu magambo ye, Blinken yagize ati: “Nkurikije isesengura rya Minisiteri y’Ububanyi n’Amahanga yitondeye amategeko n’ibimenyetso bifatika, nemeje ko abanyamuryango ba SAF na RSF bakoze ibyaha by’intambara muri Sudani.”
Yahamagariye amashyaka guhagarika aya makimbirane byihuse, kubahiriza inshingano zabo mu mategeko mpuzamahanga arengera ikiremwamuntu n’uburenganzira bwa muntu, kandi abakoze aya mahano bakayaryozwa.
RSF ishinjwa kuba yarayoboye ubwicanyi bw’amoko mu burengerazuba bwa Darfur, naho mu murwa mukuru abaturage ba Khartoum bashinja ingabo z’abaparakomando gusahura, gufata ku ngufu no gufunga abaturage.
Ingabo z’igihugu zakoze ubukangurambaga bukomeye bwo kugaba ibitero by’indege mu duce RSF yigaruriye, abahanga bavuga ko bishobora kuba ari ukurenga ku mategeko mpuzamahanga.
Raporo idasanzwe yo muri Nzeri kandi yerekanye uburyo RSF n’abafatanyabikorwa bayo bakoze icyumweru cyo kwica umuryango wa Masalit, ubwoko butari abarabu , harimo kurasa abana, gutwika abantu mu ngo zabo, no gufata ku ngufu abagore n’abakobwa.
Mu ntangiriro z’Ugushyingo, imitwe wa RSF n’abarabu bakoze ubundi bwicanyi bw’amoko muri El Geneina, aho abarokotse babwiye ibiro ntaramakuru by’Abongereza Reuters ko abagabo ba Masalit babakusanyije bakabarasa, mu gihe abandi babishe bakoresheje amashoka n’imihoro.
Iyi mirwano yatangiye hagati muri Mata uyu mwaka, imaze kwimura abaturage bagera kuri miliyoni zirenga 6.5 muri Sudani, ihitana abarenga 10,000 kandi yatumye ubukungu bw’igihugu buhungabana.
UMUTESI Jessica
Rwandatribune.com
