Abasirikare b’Uburusiya bageze mu murwa mukuru Kyiv, nk’uko abategetsi baho babitangaje baciye kuri Twitter.
Minisiteri y’ingabo ya Ukraine yavuze ko “umwanzi” yageze mu karere ka Obolon, kuri 9km uvuye ku nteko ishingamategeko ya Ukraine iri hagati muri Kyiv.
Barasaba abaturage baho gukoresha ibicupa byacanyemo umuriro bizwi nka Molotov cocktails mu kubarwanya, ari nako basaba abandi gushaka ubwihisho.
Bagira bati: “Mwitonde baturage. Ntimuve mu ngo zanyu!”
Amashusho amwe yerekanye ibimeze nk’ibifaru by’Uburusiya bigenda mu mujyi wa Obolon.
Umunyamakuru wa BBC i Kyiv kare yavuze ko humvikanye urusaku rw’amasasu nubwo ngo icyo gihe batari bizi icyo bisobanuye. Ubu avuga ko bari kumva ibisasu biremereye.
Igisirikare cya Ukraine kiri kugerageza gusubiza inyuma ibitero bigari by’Uburusiya byagabwe iburasirazuba, amajyepfo, n’ibyavuye mu majyaruguru ubu byageze ku murwa mukuru.
Mu ijoro ryo kuwa kane, imiryango myinshi y’i Kyiv yagiye kwikinga muri station za metro zo munsi ngo itagerwaho n’ibisasu biri kuraswa.
Nick Beake umwe mu batuye i Kyiv yabwiye BBC ati: “Putin, turashaka kukubona wicwa nk’inyamaswa.”
Muri video yatangajwe kare kuwa gatanu, Perezida Volodymyr Zelensky yatangaje ko “Bavuze ko [Abarusiya] abasivili batagambiriwe. Ariko ukuri ni uko ntacyo batoranya ahantu bari gutera.”
Ukraine ivuga ko nibura abantu 137 – abasivile n’abasirikare – bamaze kwicwa, ONU/UN yo ivuga ko abantu barenga 100,000 bamaze guhunga ingo zabo. Mu ijoro ryo kuwa kane abantu nibura 1,000 bo muri Ukraine bageze hakurya muri Pologne na gariyamoshi bahunze.
Perezida Putin – watangaje iyi ntambara kuri televiziyo – yaburiye igihugu icyo aricyo yose ko ikigerageza kwivanga gihura “n’ingaruka utigeze ubona mbere”.
Ibitero by’indege na za misile byakomeje kuraswa ku mijyi n’ibirindiro by’ingabo, mu gihe ibifaru by’intambara biri kwinjira mu gihugu bivye ku mipaka ahari hamaze igihe hakambitse ingabo z’Uburusiya zizungurutse Ukraine.
Mbere, abategetsi b’iburengerazuba bari bakomeje kuburira ko Uburusiya ko Uburusiya bwakusanyije “ingabo nyinshi” kandi bushaka gufata Kyiv.
Perezida Zelensk ariko yashimangiye ko bakomeza kurwana.
Zelensky yasabye abaturage babishoboye n’abahoze ku rugerero bose kuza bakarwana. Minisitiri w’ingabo yasabye buri wese ushobora gufata imbunda kuza bakagerageza gusubizayo Abarusiya.
Imiryango iharanira uburenganzira bwa muntu yaburiye ko ibi bitero bishobora gutera ikibazo gikomeye cy’impunzi mu Burayi.
Ibihugu bigize NATO nta mugambi bifite wo kohereza ingabo muri Ukraine, ahubwo ibikoresho n’intwaro byo gufasha ingabo zaho.
Ibindi ni ibihano bikomeye mu bukungu bikomeje gufatirwa Uburusiya na bamwe mu bategetsi n’abantu bakomeye b’iki gihugu.
BBC
