Amakuru ya Televiziyo y’igihugu avuga ko ingabo z’u Rwanda ziri muri Centrafrica zishe inyeshyamba za CPC 8 zifata mpiri babiri, kuri uyu wa Gatandatu imirwano ikomeye yabereye mu Mugi wa Damara.
Uyu mugi mu gitondo kare wabereyemo imirwano yasojwe n’inyeshyamba za CPC (Coalition of Patriots for Change) zahanganye n’ingabo za Leta zifashijwe n’iza UN ziri mu butumwa bwitwa Minusca.
Televiziyo y’Igihugu yatangaje ko inyeshyamba 8 zo mu mutwe wa CPC zaguye mu mirwano abandi babiri bafatwa mpiri.
Radio Ndeke Luka yo muri kiriya gihugu yatangaje ko igitero cy’inyeshyamba cyasubijwe inyuma n’ingabo za Leta na Minusca, ndetse imirwano ikaba yatumye hari abaturage bava mu ngo zabo barahunga.
Damara iri mu maboko y’ingabo za Leta na Minusca, ni umugi uri kuri km 75 uvuye i Bangui niho ku ivuko rya Perezida uriho ubu, Faustin-Archange Touadéra.
Centrafrica iheruka kubamo amatora ya Perezida n’ay’Abagize inteko ishinga Amategeko, Urukiko rw’Ikirenga rwa kiriya gihugu rwatangaje ku wa Kane ko rutangaza mu buryo budasubirwaho ibyavuye mu matora ya Perezida tariki 19 Mutarama 2021, ndetse ibyavuye mu matora y’Abadepite bigatangazwa ku wa 28 Mutarama 2021.
Ruriya rukiko rwavuze ko Urwego rushinzwe amatora ANE ruzatangaza ibyayavuyemo by’agateganyo tariki 4 Mutarama 2021.
Abatishimira uko Amatora ya Perezida yagenze bemerewe gutanga ibirego hagati ya tariki 5 – 7 Mutarama 2021, naho abatishimira uko ay’Abadepite yagenze ibirego byabo bizakirwa hagati ya tariki 5 -14 Mutarama 2021 nk’uko bitangazwa n’ikinyamakuru cya hariya kitwa Corbeau News.
