Kuri uyu wa 25 Gicurasi 2022, Bagirishya Jean de Dieu uzwi nka Jado Castar yatangaje ko yasezeye ku nshingano zo kuba Visi perezida wa 2 w’ishyirahamwe rya Volleyball mu Rwanda (FRVB).
Aganira na B&B FM Umwezi, Jado Castar yavuze ko impamvu yasezeye ku nshingano atari impamvu ze bwite ahubwo asobanura ko atakibona ibyishimo muri uyu mukino nk’uko byahoze mbere.
Castar yavuze ko yandikiye ubuyobozi bwa FRVB Raphael Ngarambe ibaruwa y’ubwegure bwe.
Yagize ati “Singiye kubaho mbeshya Abanyarwanda, njye si neguye ku mpamvu zanjye bwite. Namenyesheje umuyobozi wanjye ubwegure bwanjye ngaragaza n’impamvu zirimo no kuba muri izi nshingano nta kantu nkibonamo.”
Bagirishya abajijwe icyo agiye gukora nyuma yo kwegura ku nshingano yari afite mu Ishyirahamwe ry’umukino wa Volleyball asanzwe akunda, yemeje ko agiye kuba umufana n’umunyamakuru wawo mwiza anahishura ko ateganya gushora imari muri uyu mukino.
Mu matora yabaye ku wa 29 Gicurasi 2021, nibwo Bagirishya Jean de Dieu wamenyekanye nka Jado Castar yatorewe kuba Visi perezida wa Kabiri, yungirije Ngarambe Raphaël watorewe kuba perezida w’iri shyirahamwe na Nsabimana Eric watorewe kuba Visi Perezida wa mbere.
Mu kwezi k’Ukwakira 2021, Bagirishya yatawe muri yombi azira gukoresha impapuro mbimbano aza gukatirwa amaezi 8 y’igifungo, ni amaze yaje gusoza tariki ya 14 Gicurasi uyu mwaka ari nabwo yaje guhita arekurwa.
RWANDATRIBUNE.COM
