Nyuma y’imyigaragambyo y’abaturage batuye umujinya ingabo za MONUSCO bagatwika imodoka zayo, na yo ikabamishamo amasasu, byatangajwe ko abahaburiye ubuzima ari umunani aho kuba batatu.
Byemejwe mu itangazo ryashyizwe hanze n’ubuyobozi bw’intara ya Kivu ya Ruguru ryashyizweho umukono n’umuvugizi wa Leta ya Gisirikare, Lieutenant Colonel Ndjike-Kaiko Guillaume.
Iri tangazo ryagiye hanze kuri uyu wa Gatatu tariki 08 Gashyantare 2023, rivuga ko ubuyobozi bw’iyi Ntara ya Kivu ya Ruguru bwashenguwe n’impfu z’ababuriye ubuzima muri kiriya gikorwa.
Ubu buyobozi bwabaye nk’ubugaruka ku miterere y’iki kibazo, bwavuze ko ku mugoroba wo ku ya 07 Gashyantare ubwo imodoka za MONUSCO zavaga i Rutshuru, zatezwe n’abaturage bakuwe mu byabo n’intambara bakazitezaho akaduruvayo.
Muri uko kwitabara, abasirikare ba MONUSCO bahise barekura amasasu, amwe ahinguranya abaturage bari muri iyi myigaragambyo.
Ubu butegetsi bugira buti “Ku bw’amahirwe macye abantu umunani bahasize ubuzima, mu gihe abandi 28 bakomeretse.”
Icyakora ngo ku ruhande rwa MONUSCO nta muntu n’umwe wahasize ubuzima, bugasoza bwizeza ko hazakorwa iperereza ryihuse.
RWANDATRIBUNE.COM
