Mu karere ka Kayonza raporo yakozwe n’abagenzuzi b’imari Kuva 2019 – 2022, yerekanye ko miliyoni 27.970.419Frw yanyerejwe n’abayobozi b’ibigo byo mu mashuri atandukanye yo muri ako Karere.
Abayobozi 11 b’ibigo bitandukanye by’iganjemo iby’amashuri abanza byo muri ako karere, bakoze amakosa atandukanye bituma hari amafaranga yagiye abikuzwa ariko ntihagaragazwe uburyo yasohotse ndetse n’icyo yakoreshejwe.
Abayobozi bakoze ayo makosa ni uwo ku Kigo cy’amashuri abanza cya Kabarondo (EP Kabarondo), ukekwaho kunyereza 4,243,487Frw, uwo kuri EP Shyogo ukekwaho kunyereza 2,889,810Frw, uwo kuri EP Rwagatera ,15.194,691Frw, Gs Juru Gahini, 81,225Frw, EP Kiyanja Gahini, 371,950Frw, uwo EP Mburabuturo Mukarange arakekwaho 1,11000Frw, uwa EP Tsima Gahini ni 467 000Frw, uwa EP Kiyenzi Gahini ni 622 000Frw, uwa EP Gisubizo Mukarange, ni 320,000Frw. Umuyobozi wa EP Rukore Gahini 1,313,500Frw.
Umuyobozi ushinzwe uburezi mu Karere ka Kayonza, Ntaganda Innocent, yabwiye UMUSEKE ko by’umwihariko umuyobozi w’ikigo cy’amashuri abanza cya Rwagatera, Reberaho Francois, yari yarabanje kwirukanwa mbere, nyuma yo gusanga yari yaragurishije ibikoresho by’ikigo bitandukanye.
Yagize ati “Uyu we yari yaramaze kwirukanwa mu kazi, yari amaze hafi umwaka yarirukanywe, ariko hari ubugenzuzi yakorewe mbere, hari n’ibikoresho by’ishuri yagiye agurisha, ibyo byose babihaye agaciro basanga bihagaze hafi miliyoni 15Frw.”
Yakomeje ati “Hari n’abandi bajyaga kwishyura amafaranga yakoreshejwe mu gihe yari mu butumwa bw’akazi (mission order), yajya kwishyura, abagenzuzi b’imari ntibazibone.”
Yavuze ko amakosa yakozwe ayiganje ari amafaranga yakoreshejwe ntihagaragazwe uburyo yakoreshejwe (Unsupportded document).
Uyu muyobozi yahamije ko abakekwaho kunyereza aya mafaranga bose batawe muri yombi, nyuma hakazatangazwa umwanzuro uzafatwa.
Yagize ati “Nyuma yo gukora ubwo bugenzuzi, abaregwa bahise batabwa muri yombi, ubu bakaba bafungiye muri sitasiyo zitandukanye z’Urwego rw’Igihugu rw’Ubugenzacyaha, mu gihe hagikorwa iperereza. Nyuma nibwo tuzamenya umwanzuro uzafatwa uwo ari we.”
Ntaganda yavuze Kandi ko kugeza ubu nta bukene bwaba buri mu mashuri kubera amafaranga yanyerejwe, asaba abayobozi kujya bakurikiza amategeko.
Yagize ati “Ni ugukurikiza amategeko n’imikoreshereze y’umutungo wa leta.Amategeko arahari y’imikoreshereze y’umutungo wa leta kandi arasobanutse.”
Ibi byagiye bikunda kugaragara mu bigo byinshi byo mu Rwanda n’ubwo bitarafatirwa ibihano
Uwineza Adeline
