Muri Kenya, Perezida William Ruto wa Kenya arimo kunengwa bikomeye n’abanyamategeko nyuma yo gutangaza ko ashobora kudakurikiza ibyemezo by’abacamanza “basaritswe na ruswa”
Kuwa kabiri, nibwo Perezida Ruto yavuze ko bamwe mu bacamanza biyunze ku banyapolitiki batavuga rumwe n’ubutegetsi kandi “bagambiriye” gutambamira imishinga y’iterambere ya guverinoma ye.
Mu gisubizo cyihuse, umukuru w’ubucamanza bwa Kenya Martha Koome yahaye Ruto yavuze ko gusuzugura ibyemezo by’urukiko ari ukunyuranya n’icyizere n’ububasha rubanda baha inkiko.
Mu itangazo yashyize ahagaragara, Koome yagize ati: “Iyo umukozi wa leta akangishije ko atazubaha ibyemezo by’urukiko, ubutegetsi bugendera ku mategeko buba busumbirijwe, bigaha urwaho igitugu mu gihugu”.
Aha,Koome yaboneyeho umwanya maze asaba abacamanza gukomeza kubahiriza inshingano zabo nta bwoba no kubogama kubayeho mu mategeko.
Perezida William Ruto yavuze ko bitumvikana uburyo “abantu babiri cyangwa batatu” baregera urukiko bagamije gutambamira imishinga y’iterambere Inteko Ishingamategeko yemeje ndetse n’abaturage batoye muri manifesto y’ishyaka ryatsinze.
Yongeyeho ko “Hagomba kubaho ibiganiro”, anasobanura ko ashaka ko ibyo bihinduka.
Muri Kenya, bibaho kenshi ko umuntu umwe cyangwa itsinda rishobora kuregera urukiko rukaba ruhagaritse ishyirwa mu bikorwa ry’icyemezo cyangwa umushinga runaka wa leta.
Raila Odinga utavuga rumwe n’ubutegetsi, yavuze ko ibyo Ruto yavuze ari iterabwoba kandi bihabanye n’ubutegetsi bugendera ku mategeko, ndetse avuga ko biganisha ku butegetsi bw’igitugu, maze avuga ko kuvuga biriya ku bucamanza kwa Perezida ari ukurengerera
Komisiyo y’ubucamanza bwa Kenya, ikuriwe na Martha Koome, nayo yasohoye itangazo ryayo ivuga ko “ihangayikishijwe” n’amagambo ya perezida William RUTO.
Ihuriro Law Society of Kenya ryo ryasabye ko mu cyumweru gitaha mu gihugu hose hakorwa imyigaragambyo yo kwifatanya n’ubucamanza no kwamagana ibyatangajwe na Perezida Ruto.
Mu itangazo ryasohowe ejo kuwa gatatu n’umuvugizi wa leta Hussein Mohammed yavuze ko leta yiyemeje kurwanya icyo yise “ukudahana kuri mu bucamanza”.
Perezida Ruto wagiye ku butegetsi muri Nzeri(9) 2022, amaze igihe ku gitutu no kunengwa kuzamura imisoro no kuzana imisoro mishya mu gihe izamuka ry’ibiciro ritoroheye abaturage, harimo Imisoro ibiri mishya ariyo umusoro ku nyubako leta iteganya n’umusoro ku bwisungane rusange mu kwivuza byose byaregewe urukiko, hakaba hategerejwe umwanzuro wa rwo.
Rafiki Karimu
Rwandatribune.com
