Inzego zishinzwe iperereza muri Kenya, zatangiye gukora iperereza ku rupfu rwa Geoffrey Gitobu wari umuyobozi w’Amatora mu Karere ka Gichugu, wapfuye urupfu rutunguranye yikubise hasi.
Gitobu yari ashinzwe amatora mu karere ka Gichugu, mu ntara ya Kirinyaga, iwabo wa Martha Karua, umukandida watsinzwe ku mwanya wa visi perezida – ariko waregeye ibyavuye mu matora.
Raila Odinga watsinzwe arushwa amajwi atari menshi cyane na mucyeba we William Ruto, avuga ko habaye amakosa akomeye mu majwi yatangajwe, ko atajyanye n’amajwi y’ukuri yavuye ku biro by’itora mu gihugu.
Kuwa mbere, ari kumwe na Martha Karua n’abandi benshi babashyigikiye, bagejeje ku rukiko i Nairobi inyandiko zitwawe n’imodoka nini bavuga ko ari ibihamya by’ibyo bavuga.
Urupfu rwa Gitobu rukurikiye urw’undi nawe wari ushinzwe amatora muri kamwe mu turere tugize umurwa mukuru Nairobi, wakorewe iyicarubozo maze akicwa nyuma yo kuburirwa irengero aho babarira amajwi.
Umurambo w’uyu waje kuboneka muri kilometero zigera kuri 200 ugana mu burengerazuba bwa Kenya.
Wafula Chebukati, perezida wa komisiyo y’amatora ya Kenya, mbere yavuze ko abakozi b’iyi komisiyo batewe ubwoba kubera amatora ya tariki 09 Kanama(8).
