Inkongi y’ Umuriro yadutse mu ruganda rwa gaze (gas) mu murwa mukuru wa Kenya Nairobi biturutse ku iturika ryabereye kuri uru ruganda yahitanye abantu babiri abandi bagera kuri 200 barakomereka
Umuvugizi wa leta ya Kenya avuga ko uyu muriro watewe n’ ikamyo yari yuzuye amacupa ya gaze yaturikiye hafi y’akarere gatuwemo n’abantu maze bituma haduka inkongi ikomeye y’umuriro.
Umuryango utabara imbabare wa Croix Rouge muri Kenya uvuga ko abantu 271 aribo bajyanwe mu bitaro byo mu bice bitandukanye by’umurwa mu kuru Nairobi, abandi 27 nabo bakaba baherewe ubutabazi bw’ibanze aho iri sanganya ryabereye.
Umuvugizi wa Guverinoma Isaac Mwaura avuga ko ibi byabereye ku kigo Kentainers Company ltd. hafi ya Kabansora muri Embakasi mu murwa mukuru wa Nairobi.
Abinyuzjije ku rukuta rwe rwa X uyu muvugizi yagize ati:”Iyi kompanyi yarimo yuzuza amacupa ya gaze mu gihe iyi nkongi y’umuriro yadukaga abantu batari bake bakomeretse bakaba bahise bajyanwa kwa muganga”
Inyubako iyi kompanyi ikoreramo yangiritse bikomeye cyane. Icyateje uyu muriro ntikiramenyekana kugeza ubu. Abaturage bakaba basabwa kwirinda kwegera ahabereye iyi nkongi mu gihe ibikorwa by’ubutabazi bigikomeje
Bivugwa ko iyi nkonyi yarandagatanye no munsisiro zitari nke, ibyatumye haba ubwoba ko imibare y’abapfuye n’abakomeretse ishobora kwiyongera.
Ababibonye babwiye ibinyamakuru byo muri iki gihugu ko bumvise isi inyiganyiga nyuma y’iri turika.
Umwe mu bakomeretse, Boniface Sifuna, yabwiye Reuters dukesha iyi nkuru ibyabaye agira ati: “Naturikanwe n’icupa ryaturitse igihe narimo ngerageza guhunga.
“Cyaturikiye neza na neza imbere yanje mpita ngwa hasi, ntwikirwa n’umuriro. Ni amahirwe nagize kubona nashoboye kuhava nkiri muzima”.
Rafiki Karimu
Rwandatribune.com
